DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu inisial JO ba kazu lori butir tua JP nian baku lezadu IXM, iha Terra Santa.
Iha faktus sufisiente katak, iha loron 29 fulan Setembru tinan 2024, ofendidu nia feen mak kazamentu no halo festa iha Terra Santa Komoro, maihe programa dansa foin hahu iha tuku 10:00 no komesa mosu problema iha festa laran.
Iha momentu neeba lezadu hamriik hotu hela iha Salaun laran no lezadu haree arguidu baku lezadu nia alin ida, ho nunee lezadu mos hakat besik ba arguidu hodi koalia didiak katak, labele naran baku ema, maibe lezadu hatan katak iha nee hau mak Xefe Seguransa, no lezadu hatan hasoru hau festa nain, no arguidu hatan fali ida mak o ka, no kaer butir tua JP nian ida baku kedan ba arguidu nia ulun, halo botir nakfera sai too lezadu nia ulun nakles raan sai barak, halo lezadu dezmaia monu kedan ba rai hodi lori ba halo tratamentu Sentru Saude iha Komoro.
Konsekuensia husi arguidu nia hahalok nee halo lezadu sente moras hodi ba hatoo keixa.
Tanba nee, Ministeriu Publiku akuza arguidu komete krimi Ofensa Integridade Fizika Simples neebe previstu iha artigu 145 Kodigu Penal.
Prosesu nee Tribunal rona ona arguidu nia deklarasaun antes, iha julgamentu kontinuasaun lezadu deklara katak, arguidu lori duni butir baku ba lezadu nia ulun.
Lezadu mos deklara, momentu neeba iha festa neebe ema barak haree. Tanba nee lezadu deside atu Tribunal bele rona tan sasin nain rua.
Ho nunee, Tribunal adia ba loron seluk hodi rona fali deklarasaun husi arguidu nain rua.
Audensia julgamentu nee prezide husu Juiz Jose Maria, Ministeriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku Eustaquio Guterres.
(ter)
