DILI, STLTIMORLESTE.com – Governu liu husi Ministeriu Defeza entrega kareta tatika unidade 18 ba Komando FALITIL-Forsa Defeza Timor Leste (F-FDTL) hodi reforsa servisu operasional militar sira nian.
“Ita ofisialmente entrega kareta tatiku militar unidade 18 ba Komando FALITIL-Forsa Defeza Timor Leste hodi reforsa servisu operasional militar sira nian,” hatete Ministru Defeza, Donaciano da Costa Gomes “Pedro Klamar Fuik” ba jornalista sira liu husi nia diskursu wanhira entrega Kareta tatika unidade 18 ba Komando F-FDTL iha Kuartel Jenerál F-FDTL Fatuhada, Dili, Sesta (04/07/2025).
Nia dehan, kareta sira nee ho marka Isuzu mini- Hicom unidade ualu (8) ho total orsamentu US$ 95.200 husi Orsamentu Jeral Estadu 2023, enkuantu kareta ho marka BAIC unidade sanulu (10) hola ho orsamentu US$ 600.000 neebe mai husi Orsamentu Jeral Estadu 2025.
Nia tenik, akizisaun ba viatura militar nee halo husi empreza rua mak hanesan Timor Safari no Dili Auto Service. No viatura sira nee empreza rua nee koopera hahu halo kizasaun iha 2024. Vitura militar Isuzu mini- Hicom unidade ualu nee militar sei uza ba operasaun tatika no kareta sanulu seluk sei apoia atividade administrativa militar nian loron-loron.
Ministru Defeza husu ba miltar sira atu kuidadu viatura militar neebe Governu atribui, uza viatura sira ho responsablidade nunee ninian utilizasaun bele duru.
“Institutu Defeza Nasional ohin hetan tan progresu tanba hetan tan viatura tatika de transporte pesoal, viatura tatika de administrativa neebe mak mai husi ita nia Governu hodi atribui ba ita nia forsa armadas. Hau hakarak fo hanoin deit katak iha orgaizasaun F-FDTL neebe hetan atribuisaun meu foun presiza iha jestaun ba iha meu sira nee halo didiak,” nia esplika.
Nia deklara, kareta sira nee sei distribui ba Komando Komponente sira no Autoridade Maritima Nasional hodi halo servisu. Tanba nee husu ba Komando F-FDTL atu iha kontrolu neebe rigorozu aplika ezekusaun regra militar ninian neebe estabelesidu ona atu nunee militar sira neebe uza viatura militar nee bele kumpri misaun.
Governante hatutan, foin daudaun kareta militar ida hetan asidente soke, maibe hanesan Ministru Defeza nein hetan informasaun husi komandante sira ba kazu ida nee, nein iha relatoriu ba insidente ida.
“Ita hetan fali informasaun iha publiku husi fonte informasaun publiku neebe sirkula, nein komandante atu informa asidente ida nee no nein iha relatoriu ba ida nee, tanba husu ba militar sira liu-liu Komandante Komponente sira Komandante Seksaun sira tenke kontrola viatura militar bainhira halo servisu sira militar nian,” nia deklara.
Iha biban nee Governante nee apresia ba dezenvolvimentu insitituisaun F-FDTL, tanba iha 2001 bainhira FALITIL transforma aan ba Forsa Defeza Timor Leste iha Aileu mai Dili, F-FDTL iha deit kareta mini-icon ida neebe ho segunda maun maibe ho evolusaun neebe mak iha F-FDTL iha meu militar neebe mak metade.
Nia informa, tuir lei programasaun militar neebe Governu halo 2023 nunee Governu kompromete kontinua dezenvolve instituisaun F-FDTL no meu sira.
“Ita iha planu dezenvolvimentu da forsa ita presiza ba deit iha transporte viatura de transporte pesoal hamutuk 56 unidade agora ita iha metade,” nia koalia.
Iha fatin hanesan, Xefe Estadu Maior Jeneral FALINTIL – Forsa Defeza Timor Leste (F-FDTL), Tenente Jeneral Domingos Raul “Falur Rate Laek” agradese ba Governu tanba halo tan akizisaun ba viatura militar hodi apoia servisu militar nian.
Nia husu ba militar sira atu hadomi viatura sira hanesan sira nia aan rasik nunee bele uza ba instituisaun forsa armada.
“Husu ba Estadu Maior atu aselera diretiva ba iha utilizasaun transporte militar nian nunee bele iha kontrolu neebe diak ba viatura militar neebe iha kuandu membru F-FDTL mak la utiliza ho diak Komandante sira tenke foti medida,” nia informa.
Nunee Reprezentante Empreza Timor Safari, Sidik Lijadi agradese ba Ministeriu Defeza tanba bele fo fiar ba nia iha akizasaun ba viatura militar nee.
Nia koalia, akizisaun nee halo dezde iha tinan 2023 kareta sira nee hola iha fabrika Baic Besic Interternational Automotive iha Tailandia no Xina.
Nia afirma, fabrika bele fo gante tinan rua kuandu sasan uma la diak fabrika bele responsabliza, maibe kaundu militar sira uza ba hetan asidente fabrika laiha responsabiliza.
(jen)
