DILI, STLTIMORLESTE.com – Visi Primeiru Ministru no Ministru Koordenador Asuntu Sosial no Ministru Dezemvolvimentu Rural Habitasaun Komunitaria, Mariano Assanami Sabino enkoraja estudante sira tenke esforsu aan aprende no estuda, nunee sai jerasaun foun neebe mak iha kualidade.
Liafuan nee hatoo husi Visi Primeiru Ministru no Ministru Koordenador Asuntu Sosial no Ministru Dezemvolvimentu rural Habitasaun Komunitaria, Mariano Assanami Sabino liu husi nia diskursu ba jornalista sira wainhira halo dialogu ho estudante sira iha Eskola 4 Setembru Balide Dili, Sesta nee (04/06/2025)
Nunee tema ba dialogu nee mak Dialogu ba paz, liu husi formasaun karakter ba konstrusaun paz, konstrusaun estadu, konstrusaun ba nasaun no konstrusaun karakter.
Asanami dehan, objetivu prinsipal mak estudante sira tenke hatene aan sai joven no oan neebe mak sai estraordinariu, tanba rai ida nee presiza estraordinariu no estudante tenke sai kompetente hamutuk hodi garante paz, tanba futuru nasaun nia sei iha estudante sira nia kabas hodi lori nasaun nee ba oin.
“Sai estudante neebe mak aprende no estuda makaas, hatene respeitu profesor sira, rona profesores sira, hatene respeitu inan aman sira, estudante sira presiza esforsu aan, iha disiplina no esforsu atu aprende no estuda nunee sai jerasaun foun neebe sai kualidade no jerasaun foun neebe mak konpetente,” dehan Assanami.
Assanami sublina, estudante tenke iha mentalidade neebe mak diak atu aprende buat oin-oin, imi sei bele wainhira imi estuda no aprende barak, se iha prinsipiu neebe mak diak, hanoin neebe mak diak, ho hanoin neebe pozitivu wainhira lidera organizasaun ida sai saudavel.
“Tanba sa mak hau hili Eskola 4 Setembru, tanba imi importante tebes ba estadu no nasaun nee, imi idak-idak hamutuk mak sei determina futuru nasaun nian, imi mak sei fo kualidade ba estadu no nasaun ba futuru atu bele kompete ho nasaun sira seluk, inan aman mak manorin ba oan sira hotu, inan aman ikus liu mak estadu no nasaun, tanba nee mak estadu proteja imi, estadu fasilita imi tenke sai matenek,” katak nia.
Iha fatin hanesan, Diretor Eskola Sekundariu Jeral 4 Setembru UNAMET Dili, Sergio Alfredo da Cruz sente orgulhu tebes, tanba pela primeira vez bele halo dialogu ida neebe direita ho lideransa nivel altu sira.
“Prezensa ita nia nai ulun sira iha nee tanba konsidera estudante sira mak hanesan jerasaun foun ba nasaun ida nee, no nasaun ida nee hein hela imi iha futuru, nunee hatudu imi aan hanesan estudante neebe mak iha disiplina hodi hatudu katak, Eskola 4 Setembru, eskola publiku mos bele,” dehan Deiretor Eskola 4 Setembru Sergio.
Nunee, iha dialogu ida nee nia mos husu ba eatudante sira hotu atu toma atensaun ho diak, ho seriu, disiplina, tanba tempu ida ohin tempu osan mean ba ita hotu, tanba nee aproveita didiak tempu nee, ba liafuan sira importante neebe mak lideransa sira hatoo rai iha imi nia aan, rai iha familia no rai iha sosiedade.
Entretantu Estudante Eskola Sekundariu Jeral 4 Setembru UNAMET Dili, total estudante hamutuk 2.389, kada turma hamutuk 45 estudante, total turma hamutuk 48, iha turma 24 dader no turma 24 loraik, ho total profesores hamutuk nain 75.
(EST 1)
