DILI, STLTIMORLESTE.com – Football Club Polisia Nasional Timor Leste (FC PNTL) ohin arranka ona ba nasaun Vietnam hodi partisipa iha eventu jogu ASEAN Pool epoka tinan 2025.
Prezidente FC Polisia Nasional Timor Leste, Suprintendent Xefe Polisia, Antonino Mauluta ba jornalista STL iha Aeroportu Internasional Preziente Nicolau Lobato Dili, Sabadu (05/07/2025) dehan, ohin mai despedida FC-PNTL hamutuk ema nain 30, kompostu husi jogador 23 no ofisiais nain 7 ba tuir Jogu ASEAN Pool epoka tinan 2025 iha nasaun Vietnam.
“Hau nuudar Prezidente FC PNTL atu informa ba publiku katak, antes ita nia ekipa FC-PNTL aranka ba iha Vietnam, ita mos partisipa iha Avo Nana Copa, ita sai primeiru lugar, depois ita kontinua halo preparasaun, nunee ita mos hetan konvite husi nasaun Vietnam atu partisipa iha jogu Aseanapol epoka tinan 2025,” dehan nia.
Nia haktuir tan katak, ekipa ida nee ba iha Vietnam lori instituisaun PNTL nomos Nasaun Timor Leste (TL) nia naran. FC PNTL ba neeba lidera husi Inspetor Xefe, Domingos Ximenes nuudar Menejer ba FC PNTL ba iha Nasaun Vietnam. FC PNTL sei joga iha loron 7 de Julhu hasoru Australia.
“Ami nia esperansa katak, primeiru sira sei joga ho diak, depois sira sei mantein disiplina ho diak no sira joga sei manan. Ida nee mak ami nia esperansa, sira sei hatudu sira nia talentu jogu iha kampu no sira sei hatudu disiplina iha kampu nian, liu-liu iha regras joga nomos sei garante katak sira sei hamorin naran TL nomos Instituisaun PNTL. Hau nia liamenon ba jogador FC PNTL katak, wainhira imi sai husi TL, imi ba nee laos lori imi nia pesoal maibe imi ba nee lori instituisaun PNTL nia naran no lori TL nia naran, tanba nee husu atu mantein disiplina no kumpri Manejer ho crew neebe akompanha imi, husu atu disiplina joga, disiplina han no disiplina deskansa. Tanba nee ita fiar katak, wainhira imi sai husi TL, ema hotu-hotu hein katak imi ba ho diak, fila mos ho diak, nunee mos fiar katak imi joga iha Vietnam sei hetan rezultadu diak no sira sei fila mai TL iha loron 15 fulan Julhu tinan 2025.
Iha fatin hanesan, Eduardo Perreira nuudar Treinador FC PNTL no treinador ba Federasaun Futebol Timor Leste (FFTL) dehan, sira ninia preparasaun durante nee lao diak loos, tanba rezultadu foin lalais FC PNTL hatudu ona, sai kampiaun iha Taxa Abo Nana.
“Ita esperansa katak, ba jogu iha ASEAN Pool iha Vietnam nee.sei hetan rezultadu pozitivu ba PNTL no ba povu TL,” dehan treinador FC PNTL.
Nia dehan, ekipa FC PNTL, jogador 23 pesoas no ofisiais nain 7.
Tuir observasaun STL iha Aeroportu Internasional Prezidente Nicolau Lobato Komoro, Dili, Tuir Prezidente FC PNTL, Suprintendent Xefe Polisia Antonino Mauluta halao despedida ba jogador FC PNTL, akompanha husi Sekretariu Jerel Klubu PNTL, Inspetor Xefe Polisia, Inosencio Araujo da Silva ho ajudante Campo Komandante Jeral Inspetor Xefe Cristian Dias.
(jos)
