DILI, STLTIMORLESTE.com – Diretor Tsuneishi ho Embaixador Japaun ba Timor Leste (TL) enkontru kortejia ho Prezidente Republika Jose Ramos Horta, hodi aprezenta projetu neebe sira halao iha TL ba Xefe Estadu.
Diretor Tsuneishi Shipbuiling, Takuma Ashida ho Embaixador Japaun Ba TL, Kimura Tetsuya hamutuk ho ekipa halo enkontru kortejia ho Prezidente Republika Jose Ramos Horta hodi aprezenta projetu neebe Tsuneishi husi Japaun halo iha TL.
“Ohin halo enkontru kortejia ho Sua Excelência Prezidente Republika ho delegasaun atu aktualiza sira nia projetu iha Timor Leste,” dehan Embaixador Japaun ba TL, Kimura Tetsuya ba jornalista sira iha Palasiu Prezidensial Nikolao Lobato, Bairo Pite Segunda (07/07/2025).
Iha hasoru malu, delegasaun nee fo agradese ba Prezidente Republika Jose Ramos Horta kona-ba sira nia projetu neebe mak halo iha TL.
Embaixador Japaun ba TL hatete, Tsuneishi Shipbuiling establese ona sira nia edifisiu iha TL tinan ida ho balun ona no agora daudaun sira fo ona servisu ba projetista 37 sira neebe dezenhu roo maioria estudante neebe gradua husi UNTL.
“Hanesan ita boot sira hatene, katak Tsuneishi estabelese ona sira nia edifisiu iha TL maizumenus tinan ida ho balun depois neste momentu sira fo servisu ona ba 37 projetistas sira neebe involve iha dezenhu roo nia neebe maioria gradua husi UNTL husi fakuldade enjeneria siensia teknolojia,” katak Embaixador.
Nia hatete, neste momentu iha ona estajiadu nain 10 neebe halao daudaun ona servisu iha Japaun iha Tokyo no fulan oin sei iha tan nain 11 neebe hamutuk 21 estajiadu neebe sei iha Japaun ba estajiu iha neeba.
Nia dehan, agora daudaun prepara hela projetu ida nee inklui ho treinamentu neebe sei halao iha Japaun nomos iha TL.
“Ida nee mak ami halo aktualizasaun ba Sua excelência Prezidente Republika sobre projetu ida nee,” katak Embaixador.
Iha hasoru malu nee Prezidente Republika Jose Ramos Horta suporta projetu neebe mak Tsuneishi estabelese iha TL.
Prezidente Republika suporta tebes ba aktualizasaun projetu ida nee, tanba iha tinan 2 liu ba delegasaun Tsuneishi mai ona TL hodi esplika ba Prezidente kona-ba sira nia intensaun no ohin delegasaun nee mai hatoo agradesimentu ba Prezidente nia apoiu.
Aleinde nee, Tsuneishi daudaun halao hela projetu viablidade iha area Manatutu, Laleia nomos iha fatin seluk tan.
(eme)
