DILI, STLTIMORLESTE.com – Eskola Sekundáriu Jeral (ESJ) 10 Dezembru Komoro, daudaun nee sei identifika livru ba kada disiplina, ho nunee sei halo proposta ba Ministériu Edukasaun (ME) bele fo apoiu ba sira nia eskola.
Lia hirak nee hatoo husi Diretor Eskola Sekundáriu Jeral 10 Dezembru Komoro, Manuel Verdial ba jornalista STL iha nia knaar fatin Komoro, Segunda nee (07/07/2025).
“Hau foin asumi kargu hanesan Diretor, neebe foin mai, relasiona ho livru manual sira nee daudaun hau sei identifika hela, atu nunee bele hatene ba livru manual ba kada disiplina idak-idak nian para hau halo proposta ba ita nian ME liu husi kurrikulu nian, nunee bele fo apoiu livru mai ami nian eskola, nee duni hau identifika tiha mak ita bele halo proposta,” nia afirma.
Manuel hatutan, total estudantes iha ESJ 10 Dezembru Komoro hamutuk 1487, profesores 69, sala aprendizajen hamutuk 30, nee duni ninia parte sei halo proposta ba ME, husu apoiu livru manual ba kada disiplina neebe sei falta.
Diretor Nasional Ensinu Sekundariu iha ME, Benjamin Gomes da Cruz Fernandes hatete, livru ba nivel sekundariu nee, livru produs rasik iha sentru impresaun hela, maibe husi Ministeriu mos hein hela dadus husi eskola mai katak, sira presiza livru hira, atu nunee Ministeriu fo livru bazeia ba sira nian pedidu neebe mak mai, kuandu pedidu mai ona nee Ministériu fo apoiu livru ba eskola sira.
“Nee duni ami husu eskola neebe mak seidauk ou menus livru tenke hatoo pedidu mai ami, labele ita koalia deit livru menus, nee sira tenke hatoo Karta mai, nunee mos meza no kadeira presiza halo karta mai, labele dehan menus deit, ita Timor nee gosta hakilar deit, maibe lakohi halo pedidu mai,” nia dehan.
Iha fatin seluk, Sergio A. da Cruz hanesan Diretor Eskola Sekundáriu Jeral no 4 Setembru Balide dehan, livru balun neebe mak iha tau iha biblioteka para estudantes sira kada loron bele asesu ba livru sira nee, maibe too agora sira nian livru manual ba materia balun seidauk kompletu.
“Livru manual mak balun falta hela, maibe hatoo ona ba iha ME, tanba livru hirak nee presiza iha hodi nunee bele fasilita estudantes no profesores sira, nee duni livru manual ba materia balun too agora sei falta hela. Ba oin ami husu ME atu bele fo apoiu livru manual ba ami nian eskola, ho nunee ami nian estudantes sira bele asesu ba iha livru sira nee, ami rai didiak iha biblioteka eskolar para ami nian estudantes sira bele asesu,” nia haktuir.
(jac)
