DILI, STLTIMORLESTE.co — Diretor Ezekutivu TIC Timor sujere ba Ministeriu Justisa liu–liu Diresaun Servisu Rejistu Notariadu atu servisu hamutuk ho TIC Timor, nunee bele backup database atu labele iha risku.
“Hau hanoin sistema sira neebe iha Ninisteriu Justisa liu-liu iha notariadu ami sujere ba ministru, diak liu ita komesa haree katak, backup tenke tau ona iha TIC Timor, tanba ami haree akontesimentu neebe risku ba servidor sira neebe iha notariadu,” dehan Diretor Ezekutivu TIC Timor, Venâncio Pinto liu husi diskursu molok lansamentu Portal Komisan Terras no Propriedade iha salaun Ministeriu Justisa, Segunda (07/07/2025).
Nia hatutan, servidor ba dadus sira iha Ministeriu Justisa no Ministeriu sira seluk mos bele estabelese ona iha TIC, nunee TIC bele backup.
Sublina, backup bele tau iha neeba, kuandu iha akontesimentu ruma ka kuandu Notariadu iha problema, nia backup nafatin iha TIC, hanesan mos informa iha nee, tanbai sente orgulhu Sua excelência Prezidente rasik nia sasan sira hotu iha TIC hela.
Reforsa, Prizdente Repúblika, José Ramos Horta oferese ona nia database ba TIC Timor atu asegura. Tanba durante nee iha empreza balun mak asegura hela, maibe haree ba segredu nasaun, TIC Timor prontu ona atu asegura data-base sira nee.
Esplika tan, espera iha futuru bele entegra ona rede neebe integradu, hein hela notariadu atu bele ba iha sistema Balkaun Uniku, no hein hela husi MAE, fulan ida nee ita sei aselera iha Aileu no hein parte notariadu para halo komunikasaun.
Iha fatin hanesan, Ministru Justisa, Sergio da Costa Hornai hateten, Hosting nee ida tau iha Ministériu Justisa liu-liu Komisaun Terras no Propriedade hodi fasilita Server, no ida seluk atu asegura sistema nee fo duni ba instituisaun estadu mak halo Hosting.
“Atu segura ninia sistema nee ita tenke fo duni ba ita nia instituisaun estadu mak atu halo hosting ho objetivu katak dokumentu ka informasaun sira nebe mak ita iha tenke tau duni iha ita nia instituisaun Estadu ninian,” esplika nia.
Ministru Justisa hatutan, daudaun nee Governu liu husi Ministeriu Transporte no Komunikasaun iha ona Ajensia Teknolojia Informasaun no Komunikasaun (TIC) atu halao servisu hodi prezerva informasaun sira hotu.
(ter)
