DILI, STLTIMORLESTE.com – Madre Evangelina da Costa Xavier husi Kongregasaun Filhas de Maria Auxiliadora (FMA) husu inan aman sira maske halao atividade seluk maibe nafatin tau matan ba oan feto bainhira lao sai husi uma.
Madre Evangelina da Costa Xavier hatoo kestaun nee ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Segunda (07/07/2025).
Madre dehan, relasiona ho feto foinsae ida neebe mak ema oho soe iha Ainaro, ida nee notisia neebe triste, tanba nee husu inan aman sira maske halo atividade seluk maibe keta haluha tau matan ba oan feto sira bainhira sai ona husi uma ba fatin seluk.
“Mai hau mensajen ba inan-aman atu kuidadu oan feto sira, liu-liu oan feto sira sai ba fatin ida, pelumenus husu tuir, too ona ka lae, fila ona ka lae. Tanba dala barak inan-aman hotu preokupa ba sira nia servisu hotu neebe sira halo, entaun dala barak la husu tuir oan feto sira nee, diak ka lae, too ona ka lae, han ona ka lae, buat simples sira nee mak dala barak inan aman sira la halo,” katak Madre.
Madre dehan, inan aman nia papel importante hodi halo komunika ho sira, labele hanoin deit servisu haluha husu tuir oan sira nia kondisaun kada loron.
“Komunikasaun entre inan-aman ho oan sira ladun mak ida nee, karik meius ida neebe halo bele oan sira bele sente ema la simu, ema komprende, ema la tau matan entaun inan-aman ninia parte mak iha interese boot ba oan sira nia edukasaun. Iha interese boot atu tau matan ba oan sira,” dehan Madre.
Nunee mos Irman Angelita Gomes husi Kongregasaun FMA hatutan, relasiona ho foinsae feto ida neebe mak ema oho soe iha Ainaro Jakarta 2, ida nee notisia neebe mak triste no husi sira nia parte nuudar relijioza nafatin ajuda buat balun neebe sira bele atu fo korajen ba feto foinsae sira.
Husi parte ami nian hau haree notísia ida nee, menina ida neebe soe iha Ainaro Jakarta 2 nee ita mos la hatene kauza husi saida. Maibe ida nee entre ida deit, maibe iha joven feto barak mos vitíma oin-oin, buat oin-oin neebe akontese, nuudar relijioza ami la tur, maibe ami mos buka dalan atu ajuda parte neebe ami bele. Ita bele salva ema ida, laos ita salva ema nain 100 hotu dala ida, maibe oituan,” dehan Madre.
Madre dehan, nia parte la hatene nia kauza oinsa maibe sira nia parte tau matan ba foinsae sira liu-liu feto sira atu tau matan aan didiak, moris ho dignu nuudar ema sarani diak.
(eme)
