DILI, STLTIMORLESTE.com – Prezidente Republika (PR), Jose Ramos Horta konvida Madre sira husi Kongregasaun Filhas de Maria Auxiliadora (FMA), hodi diskute kona-ba harii dormitoriu ba feto sira.
Bainhira remata hasoru malu, Madre Evangelina da Costa Xavier Husi Filhas de Maria Auxiliadora (FMA) ba jornalista sira iha Palasiu Prezidensial Nikolao Lobato, Bairo Pite, Segunda (07/07/2025) hatoo agradase ba Prezidente Republika neebe konvida ona sira hodi fo hanoin hamutuk no kolabora bainhira harii dormitoriu ba joven feto.
“Agradese ba Prezidente Republika neebe konvida ami, Madre Filhas de Maria Auxiliadora iha Timor Leste. Prezidente Republika ninia hanoin hakarak atu harii edifisiu ida ba labarik joven feto sira. Tanba ami mak nuudar edukadora ba labarik foinsae feto sira, entaun Xefe Estadu nia hanoin bolu ami husu ami nia hanoin atu kolabora ho nia iha parte ruma,” dehan Madre.
Madre dehan, ohin nee hanesan fo hanoin malu deit, laiha solusaun ida ba enkontru ohin nian, ohin hanesan husu deit opiniaun ba madre atu haree oinsa kona-ba edifisiu nee, no oinsa tau matan ba labarik foinsae feto sira iha Timor Leste.
Madre hatete, hasoru malu nee hodi fo hanoin hamutuk deit ho madre sira neebe mak tau matan ba foinsae feto sira.
Madre dehan, harii dormitoriu nee iha Palasiu Prezidensial ka Balide ida nee sira labele fo hatene tanba seidauk koalia loos, nunee se karik fulan ida rua nia laran se iha buat ruma sira fo hatene fila fali, tanba nee sira labele fo hatene dormitoriu nee iha Balide ka Palasiu Prezidensial.
“Nee mos ami seidauk hatene tanba ida nee halo prosesu naruk, laos buat ruma neebe kiik neebe agora koalia, aban iha rezultadu, ida nee lori tempu atu halo desizaun. Ba ami relijioza nee laos dehan agora hakarak hanoin bele lae, nee tenke reza, halo orasaun hein buka ninia klean nee oinsa, tanba nee ami labele hatan sim, tanba foin ami mai nee atu hasoru malu fahe hanoin ba malu deit,” katak Madre.
Nunee mos Madre Angelita Gomes husi FMA hatete, ohin nee mai fo hanoin ba malu deit kona-ba harii dormitoriu ba foinsae feto sira.
Karik bainhira harii ona dormitoriu ba foinsae feto sira mak Prezidente Republika husu madre sira mak tau matan? Husi parte madre sira prontu kolabora hodi tau matan ka lae? Hatan ba kestaun nee madre dehan, Madre Angelita Gomes husi FMA hatete, ida nee madre sira labele hatan lai maibe sei konsulta ho madre superiora iha Roma resposta lai mak foin fo hatene nia rezultadu.
“Ami mos ohin koalia tiha ona ho Prezidente Republika ami nuudar relijioza tenke husu Madre Jeral husi Roma, neebe ami seidauk dehan bele ka lae, ami sei halo lai karta ruma, sei koalia Madre Jeral depois mak ami sei fo hatene fali bele ka labele,” katak Madre Angelita Gomes husi FMA.
Antes nee Prezidente Republika Jose Ramos Horta hatete, tempu badak enjeneria husi Abu Dhabi sei halo konstrusaun dormitoriu ba foinsae feto sira iha Palasiu Prezidensial nia sorin, nunee bele akumula joven feto sira hodi hela ba.
Prezidente Republika hatete, antes nee koalia ona ho Madre Canosiana Balide atu harii dormitoriu iha Balide, Madre Canosiana husi Timor apoiu idea nee maibe hein resposta husi madre superiora husi Roma seidauk iha resposta ruma tanba nee Prezidente Republika rasik mak deside atu halo iha Palasiu Prezidensial nia sorin.
(eme)
