DILI, STLTIMORLESTE.com – Bankada Partidu FRETILIN iha uma fukun Parlamentu Nasional (PN) deklara, reabilitasaun estrada iha Postu Administrativu Maliana, Munisipiu Bobonaro laiha progresu, tanba governu laiha planu konkretu atu orienta kompanhia hodi halo reabilitasaun.
Kestaun nee Deputada Maria Ana Bela Savio fo sai liu husi plenaria iha Parlamentu Nasional (PN), Segunda (07/07/2025).
“Projetu nee kaer husi Kompanhia Internasional Utama Karya no tuir dadus neebe ami hetan servisu sira atrazadu tanba momentu asina kontratu la iha dezenhu valeta konkretu neebe fo orientasaun ba implementasaun,” hatete Deputada Maria Ana Bela Savio.
Nia hatutan, haree ba estrada neebe sei implika durasaun estrada iha futuru, nunee governu deside obriga kompanhia nee atu halo valeta tan maibe valeta neebe halo la tuir padraun tekniku no rekezitus neebe presiza.
Tuir nia intervensaun nee laos atu destrui imajen governu nian, maibe atu hatudu katak iha nivel planu no ezekusaun governu presiza mostra kapasidade no seriedade, falta planu detalhadu antes halo kontratu.
“Klaru katak iha frakeza iha governu koordenasaun entre instuisaun no imajen estratejiku ba projetu sira neebe uza osan povu ninian, ami apela ba governu atu reforsa sistema planufikasaun envolve tekniku kompetensia antes halo asina kontratu, sira tenke asina dokumentu tekiniku sira hanesan dezenhu valeta detalhadu mediasaun foun antes liu ba prosesu reabilitasaun nian,” katak nia.
Entretantu reabilitasaun estrada Maliana ho medida 18 kilo metru ho total orsamentu tokon US$ 12 no responsabiliza husi Kompanhia Internasional Utama Karya.
Hatan ba kestaun nee, Vise Ministru Asuntu Parlamentares, Aderito Hugo da Costa katak, projetu reabilitasaun ba projetu Estrada Postu Administrativu Maliana nee tenderizasaun no implementasaun hahu kedas iha mandatu VIII Governu nian, no IX Governu mai halo akompanhamentu.
“Estrada ida nee ita hotu-hotu hatene katak Kompanhia Internasional Utama Karya no projetu nee ninia tender implementa kedas iha VIII Governu no IX Governu halo akompanhamentu kona-ba implementasaun projetu nee,” hatan nia.
Tuir Hugo katak, kuandu projetu reabilitasaun nee paradu ona, signifika empreza nee laiha kapasidade ba implementasaun projetu Estrada Maliana nee.
“Entaun iha prosesu mekanizmu ba tenderizaun iha governu anterior nee mak falha maibe IX Governu kuandu kaer ukun liu husi MOP halo kedas observasaun direita iha terenu kona-ba implementasaun projetu nee para atu haree,” haktuir nia.
Tan nee IX Governu nia manda haree katak empreza nee laiha kapasidade no hanoin katak atu hapara, governu haree katak iha nafatin oportunidade hodi finaliza servisu nee.
(alb)
