DILI, STLTIMORLESTE.com – Ministeriu Edukasaun (ME) lakohi estudantes husi Eskola Rainha da Paz sai vitima, tanba nee horiseik koloka ona estudantes hamutuk 371 ba eskola publiku.
Asuntu nee hatoo husi Superintendente Edukasaun Munisipiu Dili, Cesarina Correia Guterres ba jornalista sira iha Hotel Novo Turizmu Bidau, Tersa nee (08/07/2025).
“Ita nian estudantes husi Eskola Rainha da Paz hamutuk 371, nee kompostu husi Ensinu Baziku no sekundariu, nee sira rejistu hamutuk iha Edukasaun Munisipiu Dili, horiseik ami enkontru ho inan aman no fundasaun, depois koloka ona ba eskola sira, ohin nee estudantes sira aprezenta aan ona ba eskola sira,” nia dehan.
Nia dehan, estudantes sira nee koloka ba iha Eskola Sekundáriu FINANTIL no Eskola Sekundariu 10 Dezembru, Nivel Ensinu Baziku nian koloka ba iha EBC 30 Agostu ho EBC 10 Dezembru Komoro, depois ba filial nian mak koloka ba iha EBF Fomentu, EBF Aimutin no EBF 5 Komoro.
“Antes nee hanesan ohin Sekretariu Estadu dehan ona, estudantes idak-idak ba aprezenta aan ona iha munisipiu, entaun sira neebe mak ba aprezenta aan ona mak ninia volume ohin hau temi ona nee, maibe ba sira neebe mak seidauk ba aprezenta aan nee ami labele identifika,” katak nia.
(jac)
