DILI, STLTIMORLESTE.com – Visi Primeiru Ministru no Ministru Koordenador Assuntu Ekonomiku no Ministru Turizmu no Ambiente, Fransico Kalbuady Lay hatete, Governu kontinua tenta dezenvolve fatin turizmu hodi atrai turista vizita Timor Leste.
Visi Primeiru Ministru no Ministru Koordenador Assuntu Ekonomiko no Ministru Turizmu no Ambiente, Fransico Kalbuady Lay hatoo kestaun nee ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (08/07/2025).
Visi Primeiru Ministru dehan, iha rai hotu laiha rai ida mak halo hotu kedas iha loron ida, maibe presiza tempu atu dezenvolve, tanba nee IX Governu nafatin esforsu atu halo atividade tuir planu neebe iha ona hodi dezenvolve turizmu iha Timor Leste.
Fulan Outubru Timor Leste tama ona ba ASEAN, maibe husi Parte Ministru Turizmu durante nee promove ona fatin Turizmu hira nunee bainhira tama ASEAN bele atrai turista sira mai? Hatan ba kestaun nee Ministru Turizmu hatete, fulan Outubru nee Timor Leste adezaun ba ASEAN seidauk koalia too turizmu.
“ Fulan Outubru nee dehan adezaun neebe seidauk koalia too turizmu iha neeba, nee ita koalia uluk serimonia adezaun nia, hau so bele responde ba ita boot mak nee deit,” katak Visi PM no Ministru Turizmu.
Durante nee dezenvolve ona turizmu iha Timor Leste hira? hatan ba kestaun nee Ministru hatete bele haree rasik dezenvolve ka lae?.
“Ita boot sira haree rasik dezenvolve ka lae? Fila ba ita boot sira mak haree ho matan, hau dehan ona ba ita boot katak ita boot mos haree rasik,” katak Ministru.
Publiku kestiona katak durante nee seidauk dezenvolve fatin Turizmu iha rai laran hodi bele atrai turista sira mai vizita Timor Leste? Hatan ba kestaun nee Ministru hatete, laiha rai ida mak buat hotu lao dala ida iha loron ida.
“Sim laiha rai ida mak buat hotu lao hotu kedas iha loron ida, Governu tenta halo masimu posivel,” dehan Ministru,” hakotu nia.
(eme)
