DILI, STLTIMORLESTE.com – Timor Leste (TL) sei partisipa Expo 2025 Osaka hodi foka ba promosaun kultura no kooperasaun rejional, iha biban nee Visi Primeiru Ministru Kalbuady Lay dehan, atividade lao kapaas tebes.
Visi Primeiru Ministru no Ministru Koordenador Assuntu Ekonomiko no Ministru Turizmu no Ambiente, Fransico Kalbuady Lay ba jornalista sira iha Palasiu Prezidensial Nikolao Lobato, Bairo Pite, Tersa (08/07/2025).
Nia hatete, nia sei partisipa Expo 2025 Osaka ho foku ba promosaun kultura no kooperasaun rejional.
“Ida nee lao kapaas tebes, hau rasik ba semana ida nee depois ita nia Sua Excelência Prezidente Republika sei ba Japaun halo servisu lubuk ida liu husi Osaka, no hau hanoin media turizmu nia loron update sobre atividade Osaka nee iha hela karik ita boot sira mak terlambat la.buat ida, hau konvida media ida rua aban bainrua iha fulan Outubru nia laran sei ba selebra dia Nasional iha Osaka,” dehan Visi Primeiru Ministru.
Visi Primeiru Ministru hatete, atividade barak maibe ba too ona Osaka mak sei haree atividade hotu, no atividade nee Governu nia.
“Nee Governu mak organiza hamutuk ho nasaun hotu-hotu, partisipante sira hanesan rai hira entaun kuaze mundu tomak iha neeba hotu, GMN sei ba ho hau, Hatutan.com sei ba hamutuk hotu iha semana ida nee nia laran, liput tiha mak depois lori mai ita boot sira haree, se ita boot sira ba mos bele partisipa liu liu media sira hatete hela ba jeneral manajer ka nain sira nee katak haruka netik imi ba haree rasik ho matan,” katak Visi Primeiru Ministru.
Vise Primeiru Ministru, Ministru Koordenador Asuntus Ekonomikus no Ministru Turizmu no Ambiente, Francisco Kalbuadi Lay lidera delegasaun Timor Leste iha serimonia abertura Expo 2025 Osaka, Kansai, Japaun, neebe halao iha illa Artifisial Yumeshima, husi loron 13 Abril too loron 13 Outubru tinan 2025, ho lema “Harii Sosiedade Aban Bainrua Nian ba ita nia Moris”. Akompanha husi membrus Governu no Parlamentu Nasional.
Vise Primeiru Ministru sublina, importansia husi espozisaun universal ida nee hanesan plataforma atu promove identidade nasional, potensia ekonomika no reforsu relasoins multilaterais.
Timor Leste nia partisipasaun iha Expo 2025 nuudar oportunidade estratejika ida atu hametin nasaun nia prezensa internasional, atrai investimentu, promove interkambiu kultural no ekonomiku, no afirma nia kompromisu ba objetivus Dezenvolvimentu Sustentavel Nasoins Unidas nian. Loron Nasional Timor Leste nian iha Expo marka ona ba loron 28 Agostu tinan 2025, data ida neebe sei sai hanesan selebrasaun espesial ida ba kultura nasional.
(eme)
