DILI, STLTIMORLESTE.com – Konstrusaun edifisiu foun Eskola Sekundariu Nobel da Paz atinji ona 25% no edifisiu nee andar ho sala neen (6).
Tuir Diretor Eskola Sekundariu Nobel da Paz, Jeremias P. de Jesus ba jornalista STL iha nia knaar fatin Kintal boot, Kuarta nee (09/07/2025).
“Edifisiu ida uluk nee ami nian estudantes sira agora daudaun uza ba iha prosesu ensinu aprendizajen, agora ba iha edifisiu segundu neebe mak agora ami halo konstrusaun hela nee, nee atinji ona 25%, tanba ai riin harii daudaun, sinta rai mos cor hotu ona, daudaun ateru hela rai para hada batako sae, depois cor tan sinta leten nee ita bolu molen mai cor deit ona, nee duni ita bele dehan 25% hotu ona,” dehan nia.
Jeremias dehan, tuir lo-loos sira atu prepara sala 12, sala 6 iha kraik no iha leten sala 6, maibe parte leten ninia sira sei haree ba iha orsamentu, maibe parte kraik ninia daudaun nee falta deit 75% no sira hein fulan rua nee bele entrega ona ba sira, tanba nee fulan Agostu ou fulan Setembru tinan nee entrega ona para estudantes sira bele uza edifisiu nee iha ezame nasional neebe sei halao iha fulan Outubru tinan nee.
“Iha kraik nee sala neen (6), maibe rua (2) kantor no haat (4) mak ami nian estudantes sira uza, agora parte leten nian ami sei haree ba iha orsamentu, tanba Eskola Nobel hanesan eskola privadu, tanba uza rasik ninia osan,” katak nia.
(jac)
