DILI, STLTIMORLESTE.com – Okupantes neebe mak hela iha areador Eskola 10 Dezembru Komoro ohin sira hahu sobu ona fatin, hodi bele hamamuk fatin refere.
Hatete Diretor Eskola Sekundariu Jeral 10 Dezembru Komoro, Manuel Verdial ba jornalista STL iha Komoro, Kuarta nee (09/07/2025).
“Ohin ita nian okupantes sira nee hahu sobu ona sira nian hela fatin no balun tula daudaun ona ba kareta, tanba kareta husi munisipiu estenbai iha nee, balun sei sobu hela, balun neebe ba munisipiu nee sira ba no balun iha Dili, neebe kareta estenbai iha nee, ohin sira hamamuk ona fatin, tanba sira sobu daudaun ona sira nian hela fatin no balun tula daudaun ona sasan ba kareta, nee duni ohin iha seguransa sivil no polisia husi Munisipiu Dili ninia sira estenbai hela iha nee,” nia esplika.
Manuel dehan, okupantes sira nee hela iha uma ualu no xefe familia hamutuk 24 mak hela iha areador eskola ida nee, ohin sira hahu sobu ona sira nian hela fatin hodi muda ba fatin seluk.
“Aban nee balun sei iha, tanba dala ruma ohin sobu la hotu ida, hau rona ohin sira husi justisa ho autoridade munisipal fo loron tolu ba sira para sira bele hamamuk fatin nee, tanba sasan balun todan, nee duni ohin, aban no bainrua,” nia argumenta.
(jac)
