BAUKAU, STLTIMORLESTE.com – Durante tinan ida Sekretariu Estadu Kooperativa (SEKoop) aluga uma komunidade nian ida iha Suku Tirilolo, Postu Administrativu Baukau Vila, hodi utiliza ba edifisiu Servisu Administrasaun Delegasaun Territorial SEKoop nian iha Baukau.
Koordenador Sekretariu Estadu Kooperativa (SEKoop) destakadu Munisipiu Baukau, Domingos de Graca da Silva Ximenes esplika, durante destaka Delegasaun Territorial SEKoop iha Munisipiu Baukau utiliza edifisiu Administrasaun Munisipiu Baukau hodi halao servisu SEKoop no nian iha Baukau, maibe iha tinan 2024 Autoridade Munisipiu Baukau hasai husi edifisiu Administrasaun Munisipiu Baukau, tanba Administrasaun Autoridade Munisipiu Baukau prezisa fatin.
Nunee Sekretariu Estadu Kooperativa liu husi prosesu aprovizionamentu aluga uma komunidade ida iha Suku Tirilolo ho folin US$ 500.00 kada fulan hodi funsionariu sira utiliza halao servisu SEKoop nian iha Baukau, tanba durante nee laiha edifisiu propriu.
“SEKoop aluga fatin nee tuir prosesu aprovizionamentu akordu ho parte pertense US$ 500.00 kada fulan ita utiliza tinan ida,” hateten Domingos ba STL iha Tirilolo, Kuarta (09/07/2025).
Nia sublina, durante tinan ida SEKoop aluga uma komunidade, maibe iha espasu ba funsionariu sira utiliza halao servisu SEKoop nian iha Baukau, tanba aluga uma tomak.
Maibe tuir Koordenador Sekretariu Estadu Kooperativa Delegasaun Territorial iha Munisipiu Baukau nee, bainhira Institusaun Governu nian laiha edifisiu fo impaktu ba servisu Administrasaun nian, tanba la garantia ba edifisiu nia estatutu.
Maibe liu husi kooperasaun servisu Sekretariu Estadu Kooperativa nian ho Sekretariu Estadu Terras no Propriedade entrega ona edifisiu antigu ida iha Baukau atu halo reabilitasaun hodi utiliza ba edifisiu SEKoop nian permanente iha Baukau.
“Agora daudaun Terras oferese fatin ba SEKoop tuir prosesu legal neebe iha, SEKoop relata pedidu ba Terras Propriedade responde ona pedidu nee, entrega ona Propriedade Estadu nian fatin Alola Fundation, SEKoop tenderiza ona kompanhia balun ba reabilitasaun,” Domingos akresenta.
Koordenador nee deklara, relasiona preokupasaun SEKoop nian neebe durante edifisiu permanente ba funsionariu sira iha Baukau laiha, parte Terras Propriedade entrega ona eis edifisiu Alola Fundation iha area Uatulete Suku Tirilolo no daudaun parte kompanhia lokal neebe SEKoop kontratu iha ona terenu halo preparasaun hodi kontinua ba faze reabilitasaun.
Prosesu reabilitasaun eis edifisiu Alola Fundation ba Sekretariu Estadu Kooperativa nia funsionariu sira iha Baukau, responsabiliza husi kompanhia Marcalas Tranding Solution ba durasaun fulan rua no daudaun kompanhia refere liu husi trabalhador hahu sobu ona edifisiu refere hodi kontinua ba faze reabilitasaun, maibe la estabelese kuadru projetu.
Entretantu funsionariu SEKoop nian iha Munisipiu Baukau hamutuk nain 15 kompostu feto mane.
(tom)
