BAUKAU, STLTIMORLESTE.com – Komunidade Suku Kaikua, Postu Administrativu Vemasi, Munisipiu Baukau enfrenta problema bee moos.
Xefe Suku Kaikua, Anibal Henrique da Costa esplika, Suku Kaikua kompostu Aldeia rua mak hanesan Aldeia Bahamori no Kaikua, maibe komunidade iha Aldeia Bahamori asesu ona bee moos husi perfurasaun, enkuantu komunidade sira husi Aldeia Kaikua kontinua enfrenta problema bee moos.
“Aldeia Kaikua falta bee moos, sira uza bee husi bee matan deit sira tenke lao distansia mak foin too bee matan Uaibua nee mak foin kuru bee moos,” hateten Anibal ba STL liu husi telefone, Kuarta (09/07/2025).
Nia sublina, mezmu nunee maibe Aldeia Kaikua iha tinan 2015 hetan ona kanalizasaun bee moos husi parseiru World Vision Timor Leste, maibe komunidade sira utiliza la too tempu naruk, tanba hetan estragus husi dezastre naturais.
Nia fundamenta, husi kanalizasaun bee moos neebe hetan estragus durante nee obrigatoriu komunidade sira lao distansia naruk husi uma hela fatin Aldeia Kaikua ba matan Uaibua hafoin asesu bee moos hodi kuru lori fila ba uma utiliza ba nesesidade kada loron.
“Durante nee uma kain 27 mak difikulta tebes, tanba nee ami iha ona prioridade atu tau bee moos liu liu iha Aldeia Kaikua bele asesu mos ba bee moos,” Anibal akresenta.
Nia deklara, hanesan lideransa komunitariu durante nee aprezenta ona komunidade Aldeia Kaikua nia preokupasaun ba parte Servisu Munisipal Agua Saneamentu no Ambiente (SM-ASeA), maibe SM-ASeA diriji hikas ba Bee Timor Leste Empreza Publika (BTL,EP) Baukau, maibe la hetan resposta, tanba BTL,EP sei prioridade ba area urbana sira.
Nunee Lideransa Komunitariu nee husu parte SM-ASeA atu responde asuntu bee moos ba komunidade uma kain 27 iha Aldeia Kaikua, tanba tinan naruk ona enfrenta problema bee moos.
Hatan ba kestaun nee, Diretora SM-ASeA Baukau, Norberta da Costa hateten, preokupasaun komunidade sira husi Aldeia Kaikua kona-ba bee moos, SM-ASeA iha ona planu atu responde, maibe liu husi parseiru dezenvolvimentu balun neebe iha inisiativa atu kanaliza bee moos, maibe seidauk serteja.
“Kona-ba Kaikua nian hau labele dehan ida nee fiksu, maibe foin iha faze planeamentu no koordenasaun, parseiru sira sei buka parseiru internasional oinsa atu lobby, fo garante katak ita sei iha doadores atu tulun komunidade sira iha Kaikua,” hateten Norberta da Costa.
Norberta sublina, kona-ba responde preokupasaun refere parte SM-ASeA realiza ona enkontru internal ho parseiru nasional Roman Timor Foun no sei apoiu husi parseiru internasional balun, maibe foin faze planu.
Nia katak, bainhira planu refere implementa, SM-ASeA sei servisu ho Autoridade Suku halo planu asaun no estabelese grupu maneza fasilidade hodi tau matan ba fasilidade neebe instaladu.
Entretantu Suku Kaikua iha Aldeia rua kompostu Aldeia Kaikua no Bahamori rejistu total uma kain 329 ho total populasaun 1.969.
(tom)
