DILI, STLTIMORLESTE.com – Prezidente Republika (PR), Jose Ramos Horta halo abertura konferensia Internasional Sidade Amiga Australia ho Timor Leste (TL).
Governu Timor Leste kolabora ho Governu Australia, ofisialmente lansa konferensia Internasional Grupu Amizade ba dala lima, neebe realiza husi loron 10 too 11 Julhu 2025 iha Salaun Nobre, Ministeriu Negosiu Estranjeiru no Kooperasaun iha Dili, Timor Leste.
Serimonia abertura nee ofisializa husi Prezidente Republika Jose Ramos Horta, Ministru Administrasaun ESTATAL, Tomas do Rosario Cabral, Embaixadora Australia iha Timor Leste, Caitlin Wilson. Eventu nee halibur lider sira husi nasional, autoridade munisipal, postu administrativu, organizasaun sosiedade sivil no komunidade lokal husi nasaun rua nee.
Objetivu prinsipal husi konferensia nee mak atu hametin lasu amizade entre autoridade munisípiu no komunidade sira iha Australia no sira neebe iha Timor Leste. Nunee mos atu hametin ligasaun entre ema-ho-ema no governu-ba-governu, haburas liutan envolvimentu nivel lokal, no apoia komprensaun no kolaborasaun mútua.
Aleinde ida nee, konferensia nee mos atu kria oportunidade foun ba estabelesimentu Grupu Amizade, partikularmente ba Postu Administrativu sira iha Timor Leste neebe seidauk forma parseria. Relasaun foun sira nee atu fo kbiit ba komunidade lokal sira atu halao papel ida neebe ativu liu tan iha prosesu desentralizasaun no atu aprende husi esperiensia sira husi Rede Amizade sira neebe eziste.
Iha biban nee Prezidente Republika Jose Ramos Horta ba jornalista iha salaun MNEK Kinta nee (10/07/2025) hatoo agradese ba Governu liu husi Ministeriu Administrasaun Estatal neebe kolabora ho Embaixada Australia iha Timor Leste realiza Komferensia Internasional grupu amizade nia ba dala 5 neebe selebra ba tinan 25 Australia and Timor Leste years of Partnership.
Prezidente dehan, konferensia nee diak tebes, organizasaun mai husi Ministeriu ESTATAL ho ita nia embaixada konsuladu sira ho Embaixada Australia tanba iha Australia no fatin barak sidade barak iha grupu neebe bolu amigo de Timor balun amigu Manatuto, Laklubar, Suai, Oekusi no prosesu hahu tinan lubuk ida liu ba kuandu Prezidente Republika asumi kargu nuudar Ministru Negosiu Estranjeiru lansa ideia.
“Sira bolu Frined years of Partnership eskola ida iha Australia bele hili eskola ida iha Timor sai amigo buka ajuda no vizita ba estudante balun husi nee bai ha neeba hela ho sira eskola iha neeba, prosesu nee involve ona ema rihun ba rihun iha Australia, rihun ba rihun koinese Timor Leste,” katak PR Horta.
“Agradese ba Governu Liu husi Ministru Administrasaun ESTATAL, Tomas Cabral hamutuk ho Embaixada Australia neebe realiza komferensia Internasional Grupu Amizade nia ba dala 5,” dehan Prezidente Republika.
Nunee mos Primeiru Ministru Kay Rala Xanana Gusmão liu husi mensajen lori Governu no povu Timor Leste nia naran, agradese ba tinan 25 amizade. Tinan 25 ho ligasaun komunitaria neebe metin no signifikativu neebe muda ona ema barak nia moris ba diak liu tan.
“Hau hanoin hikas oinsa iha tinan 2000 liu ba, maske antes restaurasaun formal ba ita nia independensia, Grupu Amizade tolu hahú husi konselhu lokal sira iha Vitoria – Belun sira Baukau nian, belun sira Aileu nian no belun sira Suai/Kovalima nian. Agora iha Grupu Amizade hamutuk 32 iha Australia tomak,” dehan PM Xanana liu husi mensajen.
Xefe Governu hatete, Grupu Amizade idak-idak diferente tanba sira responde ba nesesidade no prioridade lokal sira. Belun Ballarat husi Ainaro finansia ona fatin halimar nian, fornese formasaun ospitalidade no turizmu no bolsa estudu.
Nunee mos Embaixadora Australia ba Timor Leste, Caitlin Wilson hatete, konferensia nee halibur ema liu 200 husi grupu amizade neebe serbisu hamutuk iha tempu naruk nia laran, iha kazu balun liu tinan 20.
“Konferensia nee nuudar oportunidade diak ida atu troka konhesimentu no fahe esperiensia no identifika prioridade save sira dezenvolvimentu liu husi dialogu sira entre komunidade no grupu sira amizade sira husi Timor Leste no Australia,” katak Embaixadora Australia ba TL.
(eme)
