BAUKAU, STLTIMORLESTE.com – Komando Polisia Munisipiu Baukau liu husi Seksaun Tranzitu Rodaviariu aplika koima ba transporte publiku no privadu 37, tanba motorista no kondutor sira konduz kontra lei kodigu estrada.
Komandante Polisia Munisipiu Baukau, Superintendente João Sancho Pires esplika, durante loron Segunda semana nee, Polisia Seksaun Tranzitu Rodaviariu Baukau implementa auto stop ba transporte publiku no privadu iha estrada publiku konsege prende motor 13, transporte publiku 2 no dokumentus kareta no motor hamutuk 22, tanba kontra lei kodigu estrada.
“Agora sira pasa hela blanku, balun ba selu ona iha banku no balun seidauk, maibe se deit mak viola ita sei uza tuir lei kodigu estrada neebe mak iha, no selu US$ 30.00 ba leten ba infrasaun sira,” hateten João ba jornalista sira iha knaar fatin, Kuarta (09/07/2025).
Nia sublina, husi numeru 37 neebe iha, Komando Polisia seidauk fo sai nia totalidade, tanba infrator balun seidauk selu koima, maibe komando aplika koima tuir lei kodigu estrada nian husi US$ 30.00 ba leten ba kada infrasaun sira.
Nia fundamenta, objetivu husi auto stop refere atu regulariza motorista sira iha Munisipiu Baukau lao tuir kodigu estrada nomos objetivu atu prevene asidente.
“Ba familia hotu-hotu neebe uza motor no kareta respeita sinais tranzitu para labele mosu asidente neebe mak ita la espera,” João Sancho Pires akresenta.
Komadante nee husu motorista sira atu kontinua respeita sinais tranzitu sira neebe parte relevante sira estabelese ona iha estrada publiku, tanba sinais tranzitu refere objetivu fo hanoin ba motorista atu prevene konduz motor no kareta ba asidente neebe la espera.
Aleinde nee mos husu inan aman sira labele fo motorizada ba minoridade sira atu utiliza, tanba lei kondigu estrada la autoriza, maibe bainhira hetan minoridade sira utiliza motor no kareta mak hetan asidente ruma, inan aman mak sei responsabiliza.
Enkuantu ba hirak neebe idade 18 ba leten iha oportunidade bele trata karta konduzaun nunee bele livre husi lei kodigu estrada, tanba Komando Polisia Buakau kontinua orienta parte Seksaun Tranzitu iha nivel Munisipiu no too Eskuadra implementa auto stop hodi prevene asidente.
(tom)
