DILI, STLTIMORLESTE.com – Atu selebra Festa Nain Feto do Carmo neebe monu iha loron 16 Julhu tinan nee, sarani Motael halao novena hahu husi loron 7-15 Julhu 2025.
“Atividade neebe ita halao hamutuk ho sarani sira mak halo novena preparasaun festa Nain Feto do Carmo ema ho espiritu hodi selebra festa nee,” hatete Madre Inacia Mafalda Fatima, H.Carm ba jornalista STL iha Moatel, Kinta nee (10/07/2025).
Tanba liu husi novena nee sira bele komprende, tanba sa ita tenke selebra Festa Nossa do Carmo, nunee tanba sa promove ema simu Eskapulariu, laos novena deit maibe fo mos formasaun ba sira oinsa preparsaun sarani sira neebe hakarak simu Eskapulariu.
“Eskapulariu mak hanesan devosaun ida ba Nain Feto do Carmo, ita lori Eskapulariu nee signifika ita hatais Nain Feto nia hatais, maibe espiritualmente atu simboliza ema neebe simu Eskapulariu ema nee hakarak ho devosaun tomak hamutuk ho Nain Feto hakbesik aan ba Nai Maromak Liu husi ezemplu Nai Feto Nia rasik,” hatete Me. Inacia.
Nunee mos hamutuk hahi Nain Feto hanesan Maromak nia Inan neebe lori salvasaun ba ita, tan nee hahi Nain Feto durante novena ho Eskapulariu.
Me. Inacia hatete, nuudar sarani hatene Nain Feto proteje Ita moris tuir Jesus Kristu, basa Nia proteje ema husi sala atu labele monu ba tentasaun, nee mak bolu Eskapulariu.
Novena nee halao durante loron sia nia laran, hahu husi loron 7-15 Julhu 2025 no iha loron 16 Julhu selebrasaun misa Festa Nai Feto do Carmo.
(joa)
