DILI, STLTIMORLESTE.com – Lezada ho inisial MS perdua arguidu ho inisial JD, tanba haree mos ba sira nia oan neebe sei kiik.
Iha sala julgamentu laran, Juiz prosesu Jose Escurial deklara katak, krimi neebe akuza ba iha arguidu nia natureza semi publiku, lei fo dalan atu bele dada fila kuandu lezada neebe hanesan vitima ba iha prosesu nee aseita.
Tanba nee Juiz prosesu liu husi tentativa konsiliasaun no ikus mai lezada neebe hanesan eis feen deside perdua arguidu, maibe ho razaun arguidu labele halo tan aktu nee iha futuru ba lezada ka ba ema seluk.
No lezada mos deklara kona-ba kareta neebe arguidu halo estragus, lezada hadia ona la presiza arguidu fo fila fali lezada nia osan, tanba haree mos ba iha labarik neebe sei kiik. Lezada mos deklara, arguidu sira nain rua separa ona no sira iha oan nain ida.
Rona tiha ida nee arguidu mos aseita ho lezada nia pedidu.
Tribunal haree katak, lezada aseita atu fo perdua arguidu hodi taka prosesu nee, tanba nee Tribunal mos fo hanoin ba arguidu atu iha futuru labele halo tan aktu nee.
Rona tiha ida nee, Prokurador no Defeza husu ba iha Tribunal atu omologa prosesu nee, no ikus mai Tribunal deside hodi omologa prosesu nee hodi absolve arguidu husi instansia.
Tuir faktus balu katak, prosesu nee lori ba iha Tribunal, ligadu ho krimi Danu Simples neebe komete husi arguidu, hodi halo estragus ba kareta lezada nian.
Audensia nee prezide husi Juiz Jose Escurial, Ministeriu Publiku reprezenta husi Prokurador Domingos Barreto, arguidu hetan asistensia husi Defensor Publiku Jose da Silva.
(ter)
