DILI, STLTIMORLESTE.com – Komando Polísia Nasionál Timor Leste (PNTL) halao avaliasaun servisu durante semestral no orientasaun servisu ba membru sira atu halao atendimentu ba públiku diak liu tan.
“Halo ita nia knaar efisiénsia no efikasia hodi responde ba iha ita nia komunidade bazeia ba knar ne’ebé ita iha, ninia objetivu espesial, atu nunee bele halo mos atendimentu ba iha públiku, medida prevensaun no represaun sira oinsa atendimentu ba iha publiku,” hateten Komandante Jerál, Komisáriu Jerál Polísia, Henrique da Costa ba jornalista liu husi nia deskursu iha Akademia Polísia Komoro, Kinta (10/07/2025).
Tuir Komisáriu katak, iha avaliasaun nee sai hanesan pasu ida hodi bele hatoo ba Ministériu Interior no ba Primeiru Ministru hodi foti medida ba rezolve difikuldade ne’ebé Komando liu-liu Komando Munisípiu inklui unidade sira hotu.
“Aleinde ita halo avaliasaun sei iha mos orientasaun ruma ligadu ba ita nia eventu sira no situasaun rejional liu-liu preparasaun Timor Leste nian ba ASEAN no saida mak PNTL tenke prepara,” nia tenik.
Nia esplika, nunee mos ba parte servisu investigasaun kriminal atendimentu ba krimi neebe ho numeru la hanesan iha tinan 2025 kompara ho tinan 2024 iha trimestre primeiru no segundu.
No kazu sira nee iha Munisípiu kontinua aumenta no iha munisípiu balun komesa tun ona. Tan nee ba oin presiza hadia servisu no hasae intensidade kontrola iha munisípiu sira nunee bele kazu sira.
“Komandante Minisípiu no unidade sira sei aprezenta mos kona-ba sira nia dezafiu sira neebe mak sira enfrenta, ita mos informa kona-ba preparasaun ita nia ba eventu CPLP neebe mak sei realiza iha ita nia rain, hahu husi dia 14-29 fulan nee,” nia esplika.
Nia informa, komandante idak-idak tenke aprezenta difikuldade ka dezafiu neebe sira hasoru iha terenu, liu-liu ba servisu membru sira nian. Nunee bele sai hanesan relatoriu hodi hatoo ba Governu liu husi Ministeriu Interior.
Orientasaun Komando nian mak komandante unidade no Munisípiu sira tenke kontrola membru sira, no hatoo difikuldade saida mak sira hasoru iha terenu. Iha Unidade Polísia Fronteira, Unidade Polísia Marítima, Diresaun Tránzitu no seguransa Rodoviáriu inklui sira seluk tan.
“Ita nia orientasaun ba iha komandante munisipiu idak-idak no komandante unidade sira atu bele halao servisu di’ak liu tan, maske dezafiu sira durante nee hasoru”, nia konklui.
Entretantu, iha enkontru avaliasaun servisu nee, partisipa husi komandante Jerál no segundu komandante jerál no komandante PNTL munisipiu 14, nomos komandante Unidade sira hanesan, UPF, UPM, UEP, COE, BOP no unidade sira seluk tan.
(jen)
