DILI, STLTIMORLESTE.com – Diretor Servisu Edukasaun Munisipiu Likisa, Julio da Silva dehan, pre-eskolar iha Minisipiu Likisa hahu halo ona produsaun ba farda eskola, espera katak antes tinan ida nee remata, ba pre eskolar sira no ensinu baziku balun hahu utiliza ona uniforme.
Lia hirak nee hatoo husi Diretor Servisu Edukasaun Munisipiu Likisa, Julio da silva ba jornalista STL hafoin partisipa iha konferesnia internasional sidade amiga entre Australia no Timor Leste iha Salaun Nobre MNEK, Dili, Kinta (11/07/2025).
“Ba tinan ida nee eskola rua mak bele uza ona farda, maibe ba tinan oin lae, uniforme nee hotu-hotu lao, nivel munispiu sira hotu liu-liu Minisipiu Likisa no ba nivel eskolaridade sira hotu, pre-eskolar mos hahu halo ona produsaun, espera katak antes tinan ida nee remata ba pre-eskolar sira no mos ensinu baziku balun bele utiliza ona farda,” tenik nia.
Nia dehan, kona-ba farda iha Minisipiu Likisa, farda eskolar nee nian provizoriu, agora iha eskola rua mak Ensinu Sekundáriu Jeral numeru 1 Likisa no mos EBC 1,2,3 Darulete ninian tama ona ba prosesu.
“Ema halo ona maibe ba Eskola Sekundariu Jeral Likisa ho EBC Darulete nian no mos eskola sira seluk sei iha prosesu tenderizasaun, tanba kompanhia sei koalia ho inan aman hafoin ba halo produsaun ba farda nee,” dehan nia.
Nia fundamenta, ida utiliza ona nee ensinu Sekundariu Jeral, tanba sira mak halo, balun halo farda nee ba rua, balun halo ba ida, tanba nee orsamentu sei direita, tuir orientasaun eskola mak halo, inan aman sira mak koalia depois mak halo produsaun ba farda nee.
“Ita so fo deit orientasaun katak uniforme neebe mak ministeriu fo ona katak ida nee mak ita bele lao, maibe interesaun ita nian nee presu labele liu husi edukusaun neebe mak halo, katak presu neebe mak tun tanba Primeiru Ministru hateten katak farda neebe mak produz nee inan aman asesu atu bele sosa, laos tanba kualidade neebe mak diak,” sublina.
Nia sublina, orsamentu nee transfere direita husi Diresaun Nasional Ensinu Sekundariu ninian husi ministeriu rasik, tanba pre-eskolar ho ensinu baziku nee tama konta ba munisipiu neebe foti ona.
“Pre-eskolar hamutuk 47 no 67 ba ensinu baziku, ba sira nia osan hau la dekor, maibe normalmente tama hotu ona ba relatoriu, ita hein deit semana ida lae semana rua bele submete ona mai ita,” hakotu nia.
(EST 1)
