DILI, STLTIMORLESTE.com – Livru iha Eskola Hotelaria no Turizmu Bekora sufisiente hela, bele fasilita profesores sira iha prosesu aprendizajen.
Lia hirak nee hatoo husi Charles F. Guterres hanesan Diretor Eskola Hotelaria no Turizmu Bekora ba jornalista STL iha nia knaar fatin Bekora, Sesta nee (11/07/2025).
“Ami nian livru manual sira nee sufisiente hela ba ami no laiha problema, ami nian livru sira nee tau iha fatin neebe mak iha, ita tenke tau livru hirak nee iha fatin para bele asegura diak liu tan ita nian livru sira nee,” nia esplika.
Nia hatutan, iha Eskola Hotelaria no Turizmu Bekora laiha problema ba livru, tanba ho livru neebe mak iha bele fasilita diak liu tan profesores no estudante sira iha prosesu ensinu aprendizajen ninia.
Iha fatin seluk, Koordenador Gabinete Unidade Kurrikulu Nasional iha Ministeriu Edukasaun, João Mau Pelu hatete, unidade kurrikulu nasional iha Ministeriu Edukasaun kontinua produs livru manual ba disiplina hotu, ninia kuantidade depende ba numeru estudantes sira.
“Livru agora ita produs ona kuaze disiplina hotu, kona-ba sekundariu ita la ba kontratu iha liur, tanba iha sentru impresaun agora ita hein distribui ba ita nian eskola sira, ita halo impakotementu hotu ona, agora ami halo planu ba iha distribuisaun, tanba ita nian distribuisaun nee tinan ida dala rua, inisiu do ano no fim do ano,” tenik nia.
Nia dehan, inisiu do ano nee fo ba estudantes foun sira no fim do ano nee fo ba estudantes neebe mak atu tama, ninia kuantidade livru nee bazeia ba numeru estudantes neebe mak iha, nee hanesan mos kaderneta ninia neebe mak ohin mensiona.
Iha parte seluk, Diretor Eskola Sekundariu Jeral no 4 Setembru Balide, Sergio A. da Cruz hatete, sira menus livru manual ba disiplina lima, tanba nee husu ba Ministeriu Edukasaun atu bele fo apoiu ba livru manual neebe mak sira seidauk iha.
“Ami nian livru manual ba disiplina lima sei menus, tanba nee ami hanesan eskola publiku husu nafatin apoiu ba Ministeriu Edukasaun,” katak nia.
Nunee mos Diretor Eskola Sekundariu Nobel da Paz, Jeremias P. de Jesus dehan, sira menus livru manual, maibe sira nian eskola privadu la ezije governu, depende ba governu atu fo apoiu fasilidade ba sira.
(jac)
