DILI, STLTIMORLESTE.com – Governu liu husi Ministeriu Transporte Komunikasaun (MTK) hahu prega ona taxa administrativa US$ 45 ba kamioneta sira neebe transporta sasan husi Nusa Tenggara Timur (NTT) mai teritoriu Timor Leste.
Lia hirak nee hatoo husi Ministeriu Transporte Komunikasaun (MTK), Miguel Marques Gonçalves Manitelo ba jornalista sira, hafoin remata audiensia ho Komisaun D iha salaun GMPTL Parlamentu Nasional, Sesta nee (10/07/2025).
“Lei aprova ona, agora aplika taxa hahu lao daudaun, imi ba too mota ain neeba hodi haree, kamionetela sira tama mai nee taxa administrativu nee tenke selu US$ 45,” hatete Ministru.
Nia hatutan, aplikasaun taxa nee implementa tiha ona iha fulan ida liu ba, Mota Masin neeba vaskulu automatika nee halo hela instalasaun, hanesan mos iha WINI neeba, vaskulu automatika sei laiha, maibe taxa administrativa nee sira tenke selu ona, uluk la selu agora selu ona.
Nia dehan, taxa nee depois nia sae tan, ba vaskulu automatiku sae ba iha neeba, tabela tuir dekretu nee mak nia pezu liu kilo ida tenke selu US$ 5.
Tanba nee nafatin koko, kuadu implementa dekretu lei nee iha fronteira kamioneta roda sanulu mos sei selu rihun US$ 17, tanba nia todan nee liu.
“Tenke aplika taxa todan oituan, tanba kareta boot sira nee tama mai estraga ita nia estrada, ita nia infraestrutura neebe foin halo nee, ita halo estrada ema tula sasan mai husi rai liur, estraga ita nia estrada sira nee gratuita deit, entaun ita tenke halo lei no dekretu lei nee iha para sira labele tula liu sasan ho kapasidade todan, no sira tula liu kilo ida sei selu US$ 5, se nia tula liu tonelada ida selu rihun US$ 5,” nia sublina.
(alb)
