DILI, STLTIMORLESTE.com – Jurista konsidera katak, tempu too ona atu harii Supremu Tribunal Justisa (STJ), maibe epera katak ekipa komisaun rekrutamentu ba Majistradu sira ba tur iha STJ mai husi ema neebe iha kredibilidade, labele mai husi nomeasaun politiku.
Tuir Jurista Sergio Dias Quintas katak, vizaun ida husi Prezidente Republika nee diak, tanba ita nia sistema hirarkia nee seidauk kompletu too iha Tribunal Rekursu deit, no tuir norma konstituisional tenke iha Supremu Tribunal Justisa mak foin kompleta hirarkia justisa Timor nee, no vizaun PR nian diak.
“Tenke harii ona atu tur iha STJ sei estabelese lai komisaun ida neebe halo rekrutamentu ba Juiz sira atu ba tur iha STJ, espera Parlamentu Nasional aban bainrua halo rekrutamentu ba komisaun rekrutamentu ba Juiz sira, komisaun nee mak tenke kompostu husi ema neebe iha kredibilidade, labele mai husi nomeasaun politiku,” dehan Jurista Sergio Dias Quintas ba jornalista STL iha Kaikoli, Sesta nee (11/07/2025).
Nia hatutan, se iha nomeasaun politiku ba iha komisaun rekrutamentu sei afeta ba iha rekrutamentu. No tuir lei Parlamentu mak sei hili komisaun nee atu halo rekrutamentu ba Juiz mai husi kareira nain haat, Prokurador nain rua no Jurista nain ida mak sei ba tur iha neeba.
Sergio afirma, ita nia espetativa Majistradu sira neebe sei ba tur iha STJ nee tenke klase mais elevada, no mos ba Jurista ema neebe iha esperiensia laos esperiensia ba servisu tinan naruk maibe esperiensia atu elabora sentensa, tanba se la toman halo sentensa susar. No Ministeriu Publiku neebe sei ba tur iha STJ tenke prepara atu oinsa haree ba sentensa.
Akresenta tan, servisu neebe iha STJ mak elabora sentensa no sentensa nee mak sei afeta ba vida moris sosiedade nian no vida moris nasaun nian.
Konsidera, kuandu iha ona STJ, kazu neebe desizaun Tribunal primera Instansia la aseita bele rekore ba iha Tribunal Rekursu, no la aseita desizaun Tribunal Rekursu bele rekore ba iha Supremu Tribunal Justisa tanba desizaun neebe STJ foti hanesan ultima desizaun.
Iha fatin ketak, Prezidente Tribunal Rekursu, Afonso Carmona dehan katak, dezenhu ba iha STJ lao hela, tanba nee iha tempu badak sei haree hodi estabelese STJ.
“Iha hau nia pose hau hateten ona sei harii STJ, tanba nee oras nee daudaun dezenhu mos sei lao hela, depois mak ita sei haree nia prosesu tuir mai,” dehan nia.
Aleinde nee, Prezidente Republika, Jose Ramos Horta mos deklara katak, molok nia mandatu termina sei estabelese STJ atu kompleta hirarkia ba iha setor justisa nian.
(ter)
