DILI, STLTIMORLESTE.com – Angola apoiu Timor Leste dezde tempu luta too ohin loron, no sei hametin lasu amizade no iha kooperasaun iha area potensia minarai no seluk tan.
Lia hirak nee hatoo husi Embaixador Estraordinariu no Plenipotensiariu foun Republika Demokratika Timor Leste ba Republika Angola, Ivo Jorge Valente ba jornalista sira bainhira remata simu posse husi Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Sesta (11/07/2025).
Embaixador hatete, durante nia mandatu nuudar Embaixador Timor Leste ba Angola sei buka hametin lasu amizade no sei hametin koperasaun iha setor minarai no seluk tan.
Iha biban nee Embaixador mos hatoo agradese ba Prezidente Republika nomos Governu Timor Leste liu-liu primeiru Ministru Kay Rala Xanana Gusmão neebe fo konfiansa ba nia neebe reprezenta Estadu TL nia ba nasaun Angola.
“Ohin hau simu pose hanesan embaixador atu halao knaar servisu ida neebe importante tebes iha Angola, ita hotu hatene Timor Leste iha istoria ho Angola liu-liu país CPLP sira tempu naruk, Angola país ida neebe sempre suporta Timor Leste dezde uluk, dezde tempu luta, ohin loron kontinua apoiu ba TL,” dehan Embaixador.
Embaixador dehan, tuir informasaun no embaixador mos hatene katak agora daudaun Timor Leste iha ona embaixada ida Timor Leste nia iha angola Luanda, nunee nomos embaixada Angola Timor Leste iha ona.
“Saida mak ita presiza halo konserteza hau nia servisu atu reprezenta Timor Leste iha Angola ho imi nia apoiu hotu ho Governu Timor Leste nia apoiu no Prezidente nia apoiu ita haree potensia setor potensias neebe ita kolabora koopera ba oin, ita iha lasu istoriku metin tebes ho país CPLP sira liu-liu ho Angola, setor sira neebe potensia atu kolabora, ita haree katak país rua Timor Leste ho Angola iha potensia minarai petroliu iha mos potensia sira seluk, kooperasaun sira neebe ita bele loke no hahu, agora depende mos ita nia kapasidade atu simu ou halao esforsu sira neebe mak embaixada no embaixador sei halo,” dehan Embaixador.
Embaixador dehan, depois iha tempu sira mai Embaixador koko hakbesik ba Ministeriu balun neebe haree iha potensial liu-liu petroliu, defeza, seguransa, edukasaun, setor justisa, Ministru Juventude Desportu, tanba Angola iha África país ida neebe potensia boot laos ekomikamente deit maibe sira mos iha kbiit atu hatudu kapasidade iha desportu liu-liu kooperasaun juventude sira.
Embaixador hatete, potensia sira nee mak embaixador sei esrfosu hodi kee oinsa hahu halo koperasaun.
Iha biban nee Prezidente Republika Jose Ramos Horta husu embaixador atu halao servisu ho didiak, no esforsu oinsa hametin kooperasaun ho Angola.
Aleinde nee Prezidente Republika mos iha planu atu vizita Angola, embaixador nuudar reprezentante Timor Leste iha neeba tenke prepara atividade lubuk ida liga ho asuntu diplomatiku no seluk tan.
(eme)
