DILI, STLTIMORLESTE.com – Prezidente Republika (PR), Jose Ramos Horta halo Lansamentu ba Konkursu TL Women In Business Award 2025 iha Palasiu Prezidensial.
Iha biban nee Prezidente Republika Jose Ramos Horta liu husi nia diskursu iha Palasiu Prezidensial Nikolao Lobato, Bairu Pite Sesta kalan (11/07/2025) hatete, ho haksolok no ondra hamutuk ho inan sira halo lansamentu Konkursu TL Women In Business Award 2025 bisnis Women ba tinan 2025.
“Ho haksolok no ondra hamutuk ho inan sira, ama sira iha nee halo lansamentu Konkursu TL Women In Business Award 2025, aproveita hatoo parabens ba devit neebe agora hetan nomeasaun hanesan reprezentante rezidente Grupu Banku Mundial nia kleur ona iha Timor Leste no didikadu tebes ba dezenvolvimentu moris diak ba povu TL, nee duni hau fiar ho nia lideransa institusional ida ke diak tebes,” dehan PR Horta.
Iha biban nee Prezidente Republika mos husu inan sira neebe mak halo bisnis karik halo bisnis iha Munisipiu sira iha Timor Leste bele aprende no koalia lian tetun deit, maibe karik bisnis ba iha internasional presiza aprende mos lian ingles.
Nunee mos Prezidente AEMTL, Hergui Luina Fernandes Alves hatete, ohin halibur hamutuk hodi halo lansamentu Konkursu TL Women In Business Award 2025.
Prezidente AEMTL hatete, ohin halibur hamutuk atu partisipa iha lansamentu Timor Leste Bisnis Women, iha lansamentu ohin katak hahu ohin depois de lansamentu hahu loke aplikasaun katak ema hotu bele nomeia nia aan ou nomeia ema ruma neebe sira sente merese atu bele sai kandidatu ba premiu sira neebe prepara.
Prezidente ANMTL hatete, premiu ida nee halao iha tinan kotuk, no kategoria sira neebe prepara iha tinan ida nee iha kategoria 5 neebe sei loke ba nomeasaun feto emprendedorizmu sira no organizasaun sira neebe servisu iha empoderamentu feto.
“Iha premiu dahuluk fo ba inisiativa ekonomiku, segundu sei fo ba negosiu neebe lidera husi feto husi Munisipiu Dili no iha kategoria terseiru lidera husi feto iha munisipiu no kategoria dahaat ba lider feto no Dalima ba feto iha servisu finanseiru,” dehan Prezidente AEMTL.
Manan nain premiu 2024, Patriacia M. hatete, bainhira nia kompete la imajina atu manan premiu, maibe ikus nia sai manan nain.
“Kuandu hau hetan konvite tuir eventu kona-ba Timor Leste Women Bisnis, fo-foun hau hanoin atu la ba, tanba hau nunka imajina katak hau sei manan ida nee, maibe ikus mai tinan kotuk hau hamriik iha hau nia bin, feto maluk nia oin hodi simu Timor Leste Women Bisnis, buat ida neebe hau nunka imajina hau sei hetan,” katak nia.
Nia hatete, husi tempu neeba too agora iha buat barak neebe nia interese, ho manan nain ida nee bele halo nia bisnis sai boot no ba oin-oin beibeik.
(eme)
