BAUKAU, STLTIMORLESTE.com – Komando Polisia Munisipiu Baukau konsege prende ai-kameli besik tonelada ida neebe durante tinan 20 JMB subar iha Suku Triloka, Postu Administrativu Baukau Vila, Munisipiu Baukau.
Komadante Komando Polisia Munisipiu Baukau, Superintendente João Sancho Pires informa, iha loron 10 Julhu nee informador husi Komando Polisia Munisipiu Baukau detekta sidadaun inisial JMB subar ai-kameli iha nia rezidensia area Suku Triloka pedasuk hamutuk 313, nunee parte Servisu Investigasaun Kriminal too kedas rezidensia sidadaun JMB hodi evakua evidensia sira submete ba prosesu investigasaun.
“Ita detekta hela ai-kameli iha Triloka, ita orienta kedas ita nia investigasaun ba kedas fatin lori kedas sasan neebe durante nee nia tau iha nia uma total lubuk ida,” hateten João Sancho Pires ba jornalista sira iha Vila Nova Baukau, Segunda (14/07/2025).
Nia sublina, sidadaun neebe subar ai-kameli iha nia rezidensia Suku Tirilolo ho inisial JMB neebe durante prosesu investigasaun deklara aan, aikameli hirak nee nia parte ta’a iha nia toos laran no balun foti husi fatin seluk neebe rai hamutuk iha nia rezidensia hahu husi tinan 2005 too tinan 2025 nee neebe tuir planu atu lori sai, maibe la seguru nunee too parte informador husi Komando Polisia Munisipiu Baukau detekta.
Nia fundamenta, hafoin remata investigasaun parte Komando Munisipiu Baukau aplika termu identidade rezidensia ba JMB no rejistu ona iha Ministeriu Publiku ho numeru nuc 0054/25BCSIC, tanba JMB komete kazu flora fauna.
“Kazu nee, kazu flora fauna nia modalidade ita tenke lori ba Ministeriu Publiku uza lei neebe iha asegura hela Investigasaun konsultan ho Ministeriu Publiku prosesu nee tenke normal,” João Sancho Pires akresenta.
Nia deklara, aleinde mos Komando Polisia Munisipiu Baukau liu husi Servisu Investigasaun Kriminal sei tuir tan JMB nia maun neebe deskonfia durante nee faan aikameli.
Xefe Departementu Delegasaun Territorial Florestal Kafe Plantas no Industria Baukau, António José Lopes hateten, aikameli neebe parte Komando Polisia Munisipiu Baukau prende husi sidadaun JMB iha Suku Triloka pur volta tolenada ida, tanba aikameli refere volume barak.
“Aikameli nee lo-loos ita tetu, maibe buat neebe ita nia Polisia sira foti ona nee pedasuk hamutuk 313, nee katak aikameli barak, se tetu karik pur volta Um toneladas hanesan nee,” hateten António José Lopes.
Xefe Departementu Delegasaun Territorial Florestal nee katak, JMB kontra lei florestal nian, tanba aikameli patrimoniu Estadu, maibe estragus husi JMB.
Nia sublina, tuir prosesu normal aikameli parte Polisia asegura ona, maibe liu husi Servisu Investigasaun Kriminal sei ba iha Ministeriu Publiku no kontinua ba iha Tribunal hafoin entrega hikas ba parte Florestal hodi sai patrimoniu Estadu.
Entretantu tuir observasaun STL nian iha edifisiu Komando Polisia Munisipiu Baukau nota katak, aikameli refere daudaun asegura ona iha edifisiu Komando Polisia Munisipiu Baukau.
(tom)
