DILI, STLTIMORLESTE.com – Ensinu Baziku Sentral (EBC – sigla português) Manleuana kontinua deve iha rental, hodi halo kopia pontus ezame segundu periodu ba estudantes sira.
Luisa Amelia Florindo Reis hanesan Xefe Gabinete Apoiu Tekniku iha EBC Manleuana hatoo lia hirak nee ba jornalista STL iha nia knaar fatin Manleuana, Tersa nee (15/07/2025).
“Ami nafatin deve iha rental, tanba ida nee ami tama ba iha ezame periodu segundu ninia, ba osan karik ezekusaun ba trimestre segundu nian, trimestre primeiru nian mak ami konsege selu ona ba iha ezame primeiru periodu ninia, tuir planu ida segundu trimestre ninia nee uza ba konsesaun ba trimestre segundu ninia, nee duni osan ida nee sai mak ami foin ba selu ita nian rental neebe mak deve ona sira, hodi halo foto kopia ba ami nian pontus ezame sira nee,” dehan nia.
Nia dehan, kona-ba montante hira mak eskola deve iha rental nee komisaun organizadora mak hatene liu, katak uza surat tahan hira mak halo ona kopia iha rental, tanba bainhira osan nee sai Gabinete Asuntu Tekniku nee hein ba selu deit, maibe ba ezame segundu periodu ninia nee eskola kontinua deve iha rental.
Iha fatin hanesan, Adjuntu EBC Manleuana, João dos Santos dehan, total estudantes hamutuk 1.888, maibe ida neebe mak tuir ezame 751, nee ba terseiru siklu deit, maibe ba 1.137 labele tuir ezame periodu dahuluk, tanba sira nee hanaran ezame avaliasaun.
“Ohin ezame ba materia matematika no historia geografi, ita nian ezame rasik sei remata iha loron sesta feira,” dehan nia.
(jac)
