DILI, STLTIMORLESTE.com – Ensinu Baziku Sentral (EBC- sigala português) 10 Dezembru Komoro sei submete relatoriu konsesaun ba Servisu Edukasaun Munisipiu (SEM) Dili.
Haktuir Diretor EBC 10 Dezembru Komoro, Calistro A. Guterres ba jornalista STL iha nia knaar fatin Komoro Dili, Tersa nee (15/07/2025).
“Kona-ba orsamentu fulan tolu nian, hahu husi fulan Janeiru, Fevereiru no Marsu, ami bele hatete katak 100% ami ezekuta hotu ona tuir nesesidade eskola nian, tanba tenke aselera mos prosesu relatoriu, entaun bainhira prosesu relatoriu nee enkamina ona ba iha finansas Edukasaun Munisipiu Dili, entaun ami bele halo fila fali planu asaun ba primeiru no segundu periodu,” nia dehan.
Nia salienta, relatoriu sei halo notifikasaun ba nota sira, segundu sei halo hela livru kontabilidade, bainhira livru kontabilidade hotu, depois sei hein fila fali relatoriu jeral kontabilidade husi eskola filial tolu no enkaminha iha sentru 10 Dezembru atu halo livru kontabilidade jeral ida deit, bainhira remata bele submete ona relatoriu konsesaun nee ba Edukasaun Munisipiu Dili.
Iha fatin seluk, Diretor EBC Manleuana, Carlos Correia dehan, kona-ba konsesaun eskolar nee bazeia numeru estudantes neebe mak iha no kada estudantes US$ 2, daudaun nee ezekuta ona konsesaun eskolar, bainhira remata mak bele halo relatoriu ba Ministeriu Edukasaun.
“Hau sente kona-ba konsesaun eskolar nee bazeia ba numeru estudantes neebe mak iha no kada estudantes US$ 2, daudaun nee ezekuta ona konsesaun eskolar, bainhira remata mak bele halo relatoriu ba Ministeriu Edukasaun,” nia deklara.
Carlos dehan, konsesaun nee uza ba nesesidade eskola ninia, tanba bainhira ezekuta hotu ona nee husi eskola tenke halo relatoriu nee ba ministeriu, kona-ba relatoriu tinan kotuk nian nee eskola hatama kleur ona.
(jac)
