DILI, STLTIMORLESTE.com – Ensinu Baziku Sentral (EBC – sigla português) 10 Dezembru Komoro identifika ona sala neen (6), neebe presiza halo reabilitasaun, tanba kondisaun hahu aat ona.
“Ami presiza tan sala de aula neen mak ita presiza halo reabilitasaun, tanba nee ohin dader ami halo ona identifikasaun, sala tolu neebe mak ita nian komunidade sira husik hela hamutuk sala lima, tanba sala tolu durante tinan naruk komunidade sira mak okupa, maibe komunidade sai tiha ona no sala nee agora mamuk hela, no sala tolu mak iha merenda nian oin nee, tanba uma leten nee ninia kakuluk monu hotu ona no sala rua durante nee la taka kalen,” dehan Diretor EBC 10 Dezembru Komoro, Calistro A. Guterres ba jornalista STL, Tersa nee (15/07/2025).
Nia dehan, sala hirak nee ninia plafon monu hotu ona, nee duni sala de aula neen mak presiza halo reabilitasaun para estudantes sira uza ba prosesu ensinu aprendizajen iha eskola, tanba sala hirak nee ninia kakuluk hahu monu daudaun ona no ba oin husu ME atu bele tau atensaun ba asuntu ida nee.
Iha fatin seluk, Diretor Diresaun Nasional Infransturtura no Edukativu iha ME, Helio Lopes antes nee hatete, iha orsamentu konsentra ba iha sala de aula pur volta 1000 resin, sala de aulas neebe mak too agora iha kondisaun aat presiza konsentra orsamentu ba rezolve kondisaun sala de aula, tanba sala de aula mak hanesan fasilidade importante tebes-tebes hodi bele apoiu ensinu aprendizajen direitamente iha kada eskola.
“Ita hotu konsente katak, maioria eskola sira iha teritoriu nasional nee laiha moru protesaun, maibe Ministeriu iha dadus no Ministeriu nafatin tau mos prioridade entre prioridade sira seluk, prioridade tebes-tebes mai ME atu haree ba infraestruturas liga ba fasilidade sira neebe mak tuan ona, presiza urjentimente hodi ita halo konstrusaun ka reabilitasaun liu-liu sala de aula, biblioteka no sala ba profesores. Entaun moru ita halo, ita konstrui no reabilita, maibe la ba eskola hotu-hotu, eskola ida rua neebe iha nesesidade urjenti para halo moru protesaun,” nia afirma.
(jac)
