DILI, STLTIMORLESTE.com – Bainhira remata ezame segundu periodu, estudantes husi Eskola Sekundariu Jeral FINANTIL sei uza uniforme nasional.
Lia hirak nee hatoo husi Diretor Eskola Sekundariu Jeral FINANTIL, Aniceto Berlelo ba jornalista STL iha nia knaar fatin Aimutin, Tersa nee (15/07/2025).
“Depois de ita nian estudantes sira remata ezame, tama fali eskola nee estudantes sira hahu uza ona uniforme nasional, agora sira neebe mak lakohi uza nee ita sei haruka sira fila fali ba uma no inan aman tenke mai, tanba ita halo ona lansamentu ba uniforme nee iha tinan kotuk no eskola hotu tenke uza uniforme nasional, nee duni estudantes husi eskola ida nee, depois de ezame segundu periodu, estudantes sira tama fali eskola nee hahu uza uniforme nasional,” nia esplika.
Nia akresenta, estudantes husi Eskola FINANTIL maioria mai hola ona farda nee, farda nee oin tolu, ida training no rua uniforme nasional, nee duni depois de ezame estudantes husi eskola ida nee hahu uza ona uniforme nasional.
Iha fatin seluk, Diretor EBC 10 Dezembru Komoro, Calistro A. Giterres hatete, kona-ba uniforme nasional, inan aman estudantes sira mos konkorda hotu, oinsa mak estudantes sira bele uza uniforme nasional.
“Kona-ba uniforme nasional, ita nia inan aman husi estudantes sira mos konkorda katak oinsa mak estudantes sira husi eskola ida nee bele uza uniforme nasional, ida nee hanesan ho ita nian eskola sira seluk,” nia esplika.
Calistro akresenta, agora daudaun estudantes sira sei uza uniforme anterior ninia, maibe estudantes balun sosa daudaun ona uniforme nee no balun mak seidauk, tanba lansamentu ba uniforme nee halao kedas dezde iha fulan Dezembru tinan 2024.
(jac)
