DILI, STLTIMORLESTE.com – Prezidente Republika (PR), Jose Ramos Horta hatete, funsionariu publiku sira tenke servisu ho profisional, responsabilidade, Kompaixaun atu responde ba nesesidade povu.
Prezidente Republika Jose Ramos Horta hatoo lia hirak nee liu husi nia mensajen ba loron funsaun publika, Tersa nee (15/07/2025).
Maluk funsionariu publiku sira iha Timor Leste, iha Loron Funsaun Publiku nian ida nee, hau hatoo halu nia agradеsimentu no apresiasaun ba imi idak-idak ba imi nia dedikasaun neebe la hatene kolen ba ita nia nasaun,” dehan Prezidente Republika.
PR Horta dehan, funsionariu publiku sira mak nuudar fundasaun governu.
‘Dezde ita nia independensia, imi halao ona papel krusial ida hodi harii no hametin ita nia instituisaun sira. Imi nia nia esforsu loron-loron nian importante tebes atu fornese servisu esensial sira ba ita nia povu no ba progresu ita nia nasaun nian,” katak PR Horta.
Xefe Estadu hatete, iha loron importante nee husu atu funsionariu publiku sira tane aas prinsipiu no responsablidade servisu.
“Bainhira ita selebra pasu ida nee, mai ita refleta mos kona-ba dezafiu sira neebe sei mosu iha futuru no renova ita nia kompromisu atu tane aas prinsípiu transparensia, responsabilidade no exelensia iha servisu publiku. Hamutuk ita tenke kontinua halo inovasaun, adapta no servisu ho kompaixaun atu responde ba nesesidade sira neebe kontinua evolui husi ita nia povu,” katak Horta.
Iha biban nee Prezidente Republika husu funsionariu sira servisu ho prorefisional no integridade hodi fo influensia ba sidadaun sira.
“Ba ita nia funsionariu publiku sira, hau husu ba imi atu kontinua serví ho integridade, profisionalizmu no dedikasaun. Imi nia servisu diretamente influensia ita nia sidadaun nia moris no forma futuru Timor Leste nian,” katak PR Horta.
Xefe Estadu hatete, hamutuk kontinua tane aas valor transparensia, akuntabilidade no exelensia iha servisu ba nasaun doben Timor Leste.
“Ksolok Loron Funsaun Publika nian ba dala XI, hein katak imi nia dedikasaun sei kontinua inspira no foti ita nia nasaun.ho Apresiasaun,” hakotu PR Horta.
(eme)
