SINGAPURA, STLTIMORLESTE.com —Primeiru Ministru (PM), Kay Rala Xanana Gusmão apresia ho oportunidade ninia prezensa iha Singapura, atu re-afirma kooperasaun bilateral entre Timor Leste (TL) ho Singapura hodi tau ideia hamutuk ba dezenvolvimentu rejional Association Of Southeast Asian Nation (ASEAN).
PM Xanana hatoo apresiasaun nee iha ambitu enkontru bilateral ho Prezidente Republika Singapura, Tharman Shanmugaratnam iha Istana Villa Singapura, Segunda (14/07/2025).
“Hau apresia ho oportunidade nee atu re-afirma ita nia relasaun bilateral neebe forte no atu troka hanoin kona-ba dezenvolvimentu rejional,” PM Xanana hateten.
Iha enkontru nee.PM Xanana hatoo obrigadu ba Prezidente Tharman Shanmugaratnam, tanba simu delegasaun iha reuniaun bilateral nee no haksolok tebes atu fila hikas ba Singapura ho TL nia belun neebe valorizadu.
TL apresia relasaun importante konfiansa no amizade entre nasaun sira. TL haksolok tebes katak iha tempu badak Singapura sei loke Embaixada ida iha Dili, ida nee hatudu hametin relasaun entre nasaun rua nian.
Nia dehan, iha tinan barak nia laran, Singapura fo apoiu importante iha administrasaun publika, formasaun teknika no governasaun ba TL. Ida nee simu ho diak tebes husi rai TL.
PM Xanana afirma, TL hein atu harii iha fundasaun ida nee no identifika area foun sira kooperasaun nian inklui komersiu, investimentu, infraestrutura no edukasaun.
Xanana Gusmão akresenta, viajen dezenvolvimentu Singapura nian kontinua inspira. Nasaun oitoan deit mak hetan susesu hanesan nee hodi harii nasaun ida neebe modernu, dezenvolvidu ho klareza hanesan nee kona-ba objetivu, estabilidade no unidade nasional.
TL iha lisaun sira neebe iha valor kona ba maneira neebe Singapura investe ona iha ema, instituisaun no planeamentu ba tempu naruk. TL iha nafatin kompromisu tomak atu adere ba ASEAN no fo kontribuisaun pozitivu ba organizasaun rejional nee.
“Ami agradese ba Singapura nia apoiu, partikularmente iha kapasitasaun no kooperasaun teknika. ASEAN importante tebes ba ita-nia rejiaun nia dame no progresu no ita iha kompromisu atu kontribui ba ninia susesu,” Xanana Gusmão hateten.
TL hein ba adezaun formal iha Simeira ba dala 47 iha tinan ida-nee nia rohan, marku ida ba povu Timorense ho nia fatin iha Sudeste Aziatiku.
“Prezidente Singapura, hau agradese ba ita boot nia apoiu no amizade neebe kontinua. Hau hein atu aprofunda ita nia kooperasaun bilateral no hametin lasu sira entre ita nia nasaun sira iha tinan sira tuir mai,” nia hateten.
Enkontru bilateral nee PM, Xanana Gusmão akompanha husi Visi Primeiru-Ministru no Ministru Koordenador Assuntus Ekonomikus no Ministru Turizmu no Ambiente, Francisco Kalbuadi Lay, Ministru Negosiu Estranjeiru no Kooperasaun, Bendito dos Santos Freitas; Visi Ministra ba Assuntu ASEAN, Milena Maria da Costa Rangel, Sekretariu Estadu Komunikasaun Sosial, Expedito Dias Ximenes, Embaixador Timor Leste iha Singapura, Alexandre Tilman no Xefe Gabinete Primeiru Ministru, Elizabeth Exposto.
(jos)
