DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial NBCC, tanba halo agresaun hasoru nia feen lezada ho inisial VMB.
Tuir akuzasaun katak, ofendida VMB moris hamutuk hanesan feen ho laen ho arguidu NBCC iha tinan 2024, no ekonomikamente dependensia ba arguidu nia inan ho aman.
Iha fulan Julhu tinan 2024, data neebe ofendida haluha ona, haleu oras tuku 16:00 OTL, iha Likisa, arguidu MBCC lori liman basa dala rua kona iha ofendida nia kanuruk.
Konsekuensia direta husi arguidu nia hahalok ofendida hetan moras makaas iha kanuruk, liu tiha loron tolu mak foin rekupera fali, maibe ofendida la ba halo tratamentu iha hospital.
Kauza husi problema nee, tanba arguidu deskonfia ofendida neebe mai eskola iha Dili nee halo amante ho ema seluk.
Iha loron 6 fulan Agostu tinan 2024, haleu oras 16:00 OTL, iha Likisa, arguidu NBCC lori liman tuku ho makaas kona iha ofendida nia rentos, tuku dala ida kona iha ofendida nia hirus matan, tuku dala ida kona iha ofendida nia kotuk laran no kaer ofendida nia rentos dudu ba odamatan.
Konsekuensia direta hodi arguidu nia hahalok ofendida hetan moras makaas iha rentos bubu no metan, moras iha hirus matan no dada is araska, moras iha kotuk laran, bubu no metan.
Kauza husi problema nee, tanba arguidu nia rian naran Anus mak manda mensajen ba ofendida, telefone no halo video, xamada beibeik ba ofendida, tanba nee mak arguidu nia feton hateten ba arguidu nunee mak arguidu nervozu hodi mosu problema nee.
Depois de mosu problema, iha loron 19 fulan Agostu tinan 2024, familia parte rua rezolve kedas problema no iha momentu neeba arguidu deside lakohi ona forma familia ho ofendida, nunee iha loron neeba kedas sira laiha ona relasaun hanesan feen ho laen.
Arguidu NBCC halo ho forma livre, deliberada no konsientemente, hatene katak lori liman basa dala rua kona iha ofendida nia kanuruk, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak nia hahalok nee proibidu no punidu tuir lei penal.
Arguidu NBCC halo ho forma livre, deliberada no konsientemente, hatene katak lori liman tuku ho makaas kona iha ofendida nia rentos, tuku dala ida kona iha ofendida nia hirus matan, tuku dala ida kona iha ofendida nia kotuk laran no kaer ofendida nia rentos dudu ba odamatan, nuudar meiu neebe aptu hodi hamosu ofensa ba lezada nia isin lolon no saude.
Arguidu hatene katak nia hahalok nee proibidu no punidu tuir lei penal.
Tanba nee konstitui arguidu NBCC nuudar autor material ho forma konsumadu ba pratika konkursu krimi ofensa ba integridade fizika simples ho forma violensia domestika, previstu no punidu tuir arthu 145 husi Kodigu Penal no artigu 350 alinea b) husi Lei Kontra Violensia Domestika n.ยบ07/2010, loron 07 fulan Julhu.
Hatan ba akuzasaun neebe iha, arguidu nega ba faktus, katak arguidu la halo agresaun ba lezada.
Tribunal rona fali lezada, maibe lezada konfirma katak arguidu halo duni agresaun ba lezada. Rona tiha parte rua, iha alegasaun Prokurador Renato Bere Nahac husu Tribunal atu aplika pena suspensaun ba arguidu.
No defeza Marsal Mascarinhas husu Tribunal atu absolve arguidu. Rona tiha alegasaun Tribunal adia ba loron seluk hodi rona desizaun.
Audensia julgamentu nee prezide husi Juiz Singular Zulmira Auxiladora, Ministeriu Publiku reprezenta husi Prokurador Renato Bera Nahac, arguidu hetan asistensia legal husi Defensor Publiku, Marsal Mascarinhas.
(ter)
