DILI, STLTIMORLESTE.com – Polisia Nasional Timor Leste (PNTL) kaptura no asegura ona suspeitu nain 3 neebe deskonfia halo agresaun fiziku ka baku vitima Mario Quintão too hakotu iis.
Hatete Komandante PNTL Munisipiu Dili, Superintendente Xefe Polisia Orlando Gomes ba jornalista sira iha Eskuadra Dom Aleixo Aimutin, Tersa nee (15/07/2025).
Nia dehan, iha kazu asalta no omisidiu ida akontese iha loron Segunda (14/07/2025), tuir kronolojia katak, wainhira vitima tula nia namorada (seidauk hatene inisial) ho motor iha loron Domingu lori ba iha area dolok-oan Kristu Rei, Dili.
Nunee too iha dolok-oan vitima Mario Quintão istori malu ho nia namorada (feto) ida, tanba deit vitima telefone nia namorada la foti telefone, nune’e sira na’in rua istoria malu.
Nia hatutan, depois vitima ho nia namorada istoria malu hotu, too iha oras loraik deside fila husi dolok-oan, maibe too iha dalan klaran, mai too area Lecidere vitima nia namorada haruka mensajen ba iha nia maun sira.
No nia maun sira buka tuir, maibe iha Lesidere, depois nia maun sira komesa halo asaltu ba iha vitima nomos baku vitima too grave didiak, depois lori ba iha HNGV la konsege salva vitima nia vida no hakotu iis.
“Tanba nee kazu ida nee ita halo prosesu no identifika suspeitu sira no kaptura, agora detein ona oras 72 nia laran para atu kontinua aprezenta ba iha Ministeriu Publiku hodi halo primeiru interrogatóriu ba iha tribunal,” nia esplika.
Nia deklara, iha suspeitu nain 3 ho inisial JB, AD no BD mak autoridade seguransa detein no asegura ona iha sela detensaun eskuadra Dom Aleixo durante oras 72 nian laran.
“Momentu neeba depois sira baku vitima nee, tanba vitima uza motor entaun monu iha motor sira baku hotu, sira lori kedas ba iha HNGV, maibe too iha neeba la konsege salva vitima nia vida,” nia hatutan.
Nia haktuir, suspeitu nain tolu neebe mak baku vitima ne’e mai husi vitima nia namorada nia maun sira mak baku.
“Entaun ita identifika no ita foti mak sira neebe mak halo asaltu no baku vitima ne’ebe mak mate. Ita mos sei foti hotu vitima nia namorada hodi halo identifikasaun, tanba iha prosesu nia laran sira nee tama hotu atu bele kompleta dadus,” nia koalia.
Nia fundamenta katak, vitima nia isin lolon sira hetan kanek hotu too grave didiak, tanba hetan baku husi sira nain 3, nunee ba iha HNGV too hakotu iis.
Nia mos afirma, kona-ba mate isin vitima nia atu halo autopsia nee depende, se hakarak autopsia depende.
(jen)
