BAUKAU, STLTIMORLESTE.com – Postu Saude Laisorulai iha Postu Administrativu Matebian, Munisipiu Baukau, rejistu moras moras Infesaun Respiratoriu Agudu (ISPA) no Diareia besik rihun 1.
Xefe Sentru Saude Kelikai, Domingos Boavida informa, husi fulan Janeiru too Junhu tinan nee Postu Saude Laisorulai liu husi atendimentu pesoal saude sira ba komunidade sira neebe halo konsulta ba kondisaun saude iha Postu Saude Laisorulai maioria enfrenta ISPA no Diareia mak numeru aas kada fulan iha Postu Saude refere.
“Durante fulan neen ISPA hamutuk 523, Diarea liu 200, husi moras nee nia kauza mak rai rahun, tanba tempu bailoron anin hun makaas,” hateten Domingos ba jornalista sira iha Matebian, Tersa (15/07/2025).
Nia informa, husi numeru moras refere kompostu husi labarik no ema boot neebe enfrenta tipu moras rua refere, tanba kauza husi rai rahun neebe provoka husi movimentu transporte publiku no privadu liu-liu kareta fuzu husi kompanhia responsabiliza ba projetu reabilitasaun estrada ligasaun Kelikai-Ossu neebe kada loron tula material konstrusaun halo movimentu iha Postu Administrativu Matebian.
Maibe husi pasiente hirak neebe rejistu laiha pasiente ida enfrenta kondisaun moras too grave, tanba pesoal saude sira fo atendimentu diak mezmu stok ai-moruk la sufisiente iha Postu Saude refere.
“Iha parte Laisorulai durante nee seidauk iha grave, baibain deit ami halo atendimentu, stok ai-moruk la laiha liu mais item ida laiha ami taka item seluk neebe durante nee sufisiente ami uza,” Domingos Boavida akresenta.
Entretantu Postu Saude Laisorulai kobre komunidade husi Suku Laisorulai de Cima, Laisorulai de Baixo, Maluru, Lelalai no Abu.
(tom)
