DILI, STLTIMORLESTE.com – Membru Parlamentu Nasional (PN) liu husi Bankada FRETILIN, Deputadu David Mandati husu ba Governu tau atensaun ba estrada diresaun Laga no Baguia.
Kestaun nee hatoo husi Bankada FRETILIN, Deputadu David Mandati iha plenaria Parlamentu Nasional, Kuarta nee (16/07/2025).
“Hau koalia tan kona-ba estrada Laga no Baguia neebe mak komesa husi VIII Governu ninia, agora IX Governu Konstitusional besik ona tinan 2 estrada neeba nee dehan katak lao, lao hela, la lao mos, lao neineik liu, la tuir ona tempu neebe mak lo-loos estabelesidu,” dehan Deputadu.
Nia hatete, hanoin bele karik Ministru hatoo hela ba sira katak oinsa estrada nee kleur los, uluk hatoo ona katak haree took estrada nee, se feriadu karik ita boot sira ba fali took ba haree estrada refere, se lae orsida dehan bosok fali tan.
Iha fatin hanesan, Deputadu Patrocino Fernandes husi Bankada (CNRT) hatutan, husu Ministeriu Obras Publiku (MOP) tau ona prioridade ba iha fatin barak maibe haree katak ponte ida iha Caicasa neebe mak liga husi Same ba Postu Fatuberliu ponte nee labele utiliza ona.
“Ponte nee aat ona, la sala iha tinan 2019 ou 2020 la konsege hadia, aat hela maibe populasaun sira obriga aan liu husi neeba, tamba uniku konektividade mak ida nee, maibe agora labele utiliza ona, tanba nee hau husu ba Visi hatoo hela ba (MOP) tau atensaun ba ida nee, tanba uniku dalan neebe mak liu ba mai,” katak nian.
Entretantu hatan ba kestaun nee Visi Ministru Asuntu Parlamentu Nasional, Aderito hugo da Costa afirma, sei envia perguntas sira nee ba iha MOP hanesan infraestrutura ponte, estradas no projetu PNDS sira.
“Hau sei envia nafatin perguntas sira neebe iha relasaun ho asuntu hanesan liu-liu ba estatutu ba estrada husi diresaun Laga ba Baguia neebe hau mos esplika ona, no husi parte Governu mos esplika ona maibe hau sei nafatin tau atensaun oinsa estatutu kompanhia ida neebe halo estrada husi Laga – Baguia nia,” nia hakotu.
(EST 1)
