DILI, STLTIMORLESTE.com – Pezidensial Republika (PR) apoiu sasan esensial pakote 1000 ba Orfonatu sira neebe eziste iha munisipiu tolu.
Prezidensia Republika liu husi Xefe Kaza Sivil, Jesuína Maria Ferreira Gomes halao distribuisaun sasan nesesidade esensial hamutuk pakote 1000 ba iha Munisipiu Manatuto, Baukau no Vikeke.
Tuir komunikadu neebe STL asesu husi media PR Kinta nee (17/07/2025) hatete, Inisiativa nee ho objetivu prinsipal atu fo apoiu labarik no joven sira neebe presiza duni, hodi entrega sasan esensial sira hanesan manta, kamizola desportivu, no sapatu neebe oferese hosi Kompaña AB Charity Foundation, Hong Kong hodi hatan ba nesesidade urjente ba grupu populasaun ida nee.
Labarik no foinsae sira iha orfanatu sira ho ksolok simu apoiu nee, inklui labarik sira husi Buruma (Baukau) no Vikeke neebe ho kontente hatais kedan sapatu neebe sira simu no hatoo sira nia dezeju ba saude diak no reza nafatin ba Prezidente Ramos Horta.
Ide nee hatudu impaktu klean hosi jestu kompaixaun sira nee ba foinsae sira neebe presiza tebes apoiu hanesan nee iha Timor Leste.
Iha Manatuto, Amu Paroku Mario Cabral husi Parokia Santo Antonio Manatuto hatoo agradesimentu boot ba inisiativa Prezidente Republika, Jose Ramos Horta, no haktuir inisiativa nee nuudar sinal klaru husi solidariedade no kompromisu atu hatan ba realidades sosial sira neebe komunidade rural sira hasoru.
Amu paroku subliña mos katak, sasan sira neebe distribui ho lo-loos no iha tempu neebe loos, no fo tan ho justisa ba sira neebe presiza tebes duni, bazeia ba observasaun direta iha terenu.
Iha Venilale mos, Irman neebe responsavel ba Sentru akolhimentu ba orfaun sira hatudu nia apresiasaun ba jestu solidariedade husi prezidensia. Haree ba oin, lider relijiozu sira sujere katak apoiu iha futuru bele inklui material eskolar sira hanesan livru eskola nian, disionariu Portuges nian, no kadernu sira, subliña importansia husi koordenasaun ida neebe efikaz liu entre Prezidensia ho parokia sira, eskola sira, no autoridade lokal sira.
(eme)
