DILI, STLTIMORLESTE.com – Uniaun Nasional Eskuteirus Timor Leste (UNE-TL) halao enkontru ho Ministra Edukasaun (ME), hodi koalia kona-ba atividades jambore dahuluk neebe sei halao iha Munisipiu Dili.
Haktuir Prezidente UNE-TL Munisipiu Dili, Antonio da Luz ba jornalista sira iha edifisiu ME, Kinta nee (17/07/2025).
“Ohin halao enkontru ho Ministra Edukasaun hodi koalia kona-ba programa rua, ida mak atu halo lansamentu ba MoU neebe mak asina ona iha fulan hirak liu ba entre UNE-TL ho ME, asuntu primeiru nee koalia kona-ba atu hamutuk ho ME realiza atividades eksismu iha eskola sira iha teritoriu Timor laran tomak, nee hanesan atividades extra kurikuler ida neebe mak husi ME hamutuk ho UNE-TL halo, asuntu segundu mak UNE-TL Munisipiu Dili sei realiza jambore iha Munisipiu Dili dahuluk, neebe sei realiza iha loron 27 Julhu too 2 Agostu, nee sei halao iha Metinaro,” nia dehan.
Antonio dehan, tuir espetava katak, sira sei konvida partisipante sira hamutuk 500, liu-liu eskola sira iha Munisipiu Dili neebe mak agrupamentu eziste ona, agrupamentu sanolu no sei konvida munisipiu sira seluk neebe mak iha ona agrupamentu eskuteiru nian, nunee bele partisipa iha jambore ida nee.
“Atividades lansamentu no abertura ba jambore nian sei halo iha loron 28 Julhu, tuku 4:00 loraik, iha Metinaro,” katak nia.
(jac)
