DILI, STLTIMORLESTE.com – Polisia Nasional Timor Leste (PNTL) liu husi Komando PNTL Munisípiu Dili husu ba joven Bekora tenke kria pas no estabilidade iha nasaun Timor Leste (TL).
Nia dehan, problema sempre mosu iha area juridiku Postu Administrativu Kristu Rei, tanba nia fukun iha atu autoridade lokal no autoridade seguransa buka meius hodi rezolve problema sira nee.
“Hau husu ba lider no responsavel ba suku Bekora atu servisu hamutuk ho autoridade seguransa PNTL atu ita bele kria amizade pas no estabilidade iha ita nía rain,” hatete Komandante Munisípiu Dili, Superintendente Xefe Polísia, Orlando Gomes ba jornalista sira liu husi nia diskursu iha Eskuadra Kristu Rei, hafoin dialogu ho komunidade sira, Kinta nee (17/07/2025).
Nia esplika, joven sira moris ikus nee la sente saida mak joven sira uluk sente ho ida agora nee, atu valoriza ukun rasik aan ida nee presiza lideransa no autoridade lokal servisu hamutuk ho PNTL atu bele kria pas no estabilidade.
“Ita moris iha ukun rasik aan, ita rasik la valoriza ita nia ukun rasik aan no ita rasik mak dezvaloriza ita nia ukun rasik aan. Ita la.hatene katak ita nia ema barak mak lakon sira nia vida ba rai ida nee, sakrifíka no dedikasaun ba rai ida nee atu hetan nia independénsia. Ohin loron imi joven sira moris diak maibé oinsa imi atu goza rai ida nee tenke kria pas no estabilidade,” nia deklara.
Komandante nee husu ba joven sira atu kontribui ba pas no estabilidade iha rai doben Timor Leste, ida nee labele hanoin mak kria problema no inan aman mos lakohi kontrola nia oan sira no husik abandona atu sira ransu livre hodi halo problema iha fatin-fatin.
“Dala.ruma ita inan aman mak la kontrola ita nia oan sira, sira fo livre hodi ba hemu tua, gas motor, provoka ema no tuda ema nia sasan iha tempu kalan no madrugada. Tanba nee hau husu ba inan-aman atu kontrola oan sira nia deskansa kalan,” nia informa.
Iha fatin hanesan, Diretor Ezekutivu Asia Justice And Rights (AJAR), José Luís de Oliveira deklara, Timor Leste hetan nia independensia laos buat hotu nabilan, maibe sei iha buat barak mak la’o la los no injustisa sei iha.
“Dala barak problema nee mosu laos liu husi joven sira, dala ruma iha fukun ruma, maibe importante mak ita tenke tau interese ba nasaun no estadu aas, bainhira ita kontinua nafatin la hanoin interese nasaun interese estadu hanesan dezvaloriza mak ita sei laiha pas no estabilidade,” nia koalia.
Nia tenik, agora presiza atu lori rai nee ba oin, maibe konflitu violensia neebe mak iha nee presiza tuur hamutuk atu rezolve ho ulun malirin.
“Klaru injustisa no diskriminasaun sempre iha, dala barak ida nee mak hun husi problema sira, maske ita iha problema barak maibé ita sempre hatudu imajen diak katak Timor mos bele,” nia hatutan.
Nunee mos.Administrador Postu Administrativu Kristu Rei, Fernando de Araujo esplika, nuudar autoridade husu ba joven sira hatudu hahalok neebe diak no kria pas no estabilidade, tanba nee mak administrador husu ba kada xefe aldeia bolu joven sira ba tuir dialogu nee importante tebes.
Nia afirma, husu ba joven sira husi ohin ba oin depois de ida nee sai ba ita halo kedas servisu ruma neebe mak orienta ba malu, liu-liu husu ba xefe suku nain 3 hanesan xefe suku Bidau, Kuluhun no Bekora inklui mos xefe aldeia nain 3 no mos inan-aman sira tau atensaun ba sira nia oan no joven sira iha kada suku no aldeia hanorin sira no eduka sira, atu nunee labele kria problema ba malu no bainhira oan sira sai uma kalan inan-aman sira tenke bandu.
(jen)
