BAUKAU, STLTIMORLESTE.com – Sentru Solidariedade Sosial Munisipiu Baukau liu husi servisu tekniku hahu rejista ona benefisiariu ba subsidiu husi programa bolsa da mae iha nivel Postu Administrativu.
Diretor Sentru Solidariedade Sosial Munisipiu Baukau, Clementino Sarmento esplika, tuir orientasaun husi Ministeriu Solidariedade Sosial no Inkluzaun (MSSI) rejistu kandidatu benefisiariu ba subsidiu bolsa da mae iha Munisipiu Baukau lo-loos akontese iha loron 01 Junhu tinan nee, maibe liu husi koordenasaun ho Autoridade Suku iha nivel Postu Administrativu Ualu hodi aviza ba kandidatu sira hodi prepara dokumentus, tanba nee hahu rejistu iha loron 14 Julhu nee no tuir planu remata iha loron 30 Julhu nee.
“Prosesu rejistu foun lao daudaun ona no reajustamentu ba sira neebe uluk rejistu maibe dokumentus la kompletu sira seidauk hetan direitu nee, agora daudaun halo rejistu iha kada Postu,” hateten Clementino ba STL iha Vila Nova, Kinta (17/07/2025).
Nia sublina, prosesu rejistu kandidatu ba benefisiariu programa bolsa da mae, ba kandidatu reajustamentu sei hetan direitu subsidiu bolsa da mae iha tinan nee, tanba kompleta deit dokumentus balun, enkuantu kandidatu foun sira sei simu direitu iha tinan 2026.
Nia fundamenta, prosesu rejistu nee limita ba oan husi funsionariu publiku, veteranu, PNTL no F-FDTL inklui autoridade lokal sira, maibe prefere deit ba komunidade kbiit laek nia oan sira, tanba programa refere objetivu atu ajuda labarik husi komunidade kbiit laek sira asesu edukasaun.
“Programa nee prefere liu ba ema kbiit laek atu haree nia oan sira ba eskola husi SD, SMP too SMU,” Clementino akresenta.
Nia deklara, fundus neebe Governu liu husi Ministeriu Solidariedade Sosial no Inkluzaun apoiu ba benefisiariu estudante ida iha nivel estudu ensinu baziku primeiru segundu siklu hetan US$ 8.00 kada fulan, ensinu baziku terseiru siklu US$ 9.00 no estudante ensinu sekundaria kada fulan hetan US$ 10.00 kada benefisiariu, enkuantu benefisiariu estudante Ema ho Difisiensia sei hetan aumentu US$ 5.00 tuir nivel estudu neebe osan refere atu utiliza ba nesesidade eskola nian.
Entretantu subsidiu bolsa da mae nee implementa tuir dekretu Lei Nu.18/2012 neebe fo sai iha loron 04 Abril no foin halo alteração dekretu lei foun 01/2023 publika iha 03 Janeiru no artigu 10 valor subsidiu mensal inklui artigu 41 kona-ba despozisaun mudansa iha tinan 2024 pagamentu ba benefisiariu transzitoriu sira.
(tom)
