DILI, STLTIMORLESTE.com – Ekipa Prezidensial Republika (PR) halo vizita ba avo nain tolu (3) feton ho naan neebe hela iha baraka iha Maubisi.
Avo mane ho nia feton nain rua (ferik) hela hamutuk iha uma baraka ida, hetan vizita husi Prezidénsia Republika hodi bele tulun netik aman no inan ferik nain rua neebe hela iha baraka.
Tuir Komunikadu neebe STL asesu husi media PR Sesta nee (18/07/2025) katak, Prezidente Republika, Jose Ramos Horta liu husi Unidade Servisu Solidariedade no Apoiu Sosial, lidera husi asesor Quintiliano Moniz, hodi halo asaun karitativa ba avo mane ida, idade 80, naran Jose Maria Raimero ho nia feton nain rua Amelia Gonçalves Rodrigues, idade 75 no Natalia Gonçalves Rodrigues, idade 65, sira hotu hela hamutuk iha uma baraka ida iha Aldeia Hohulu, Suku Fatubesi, Maubisi.
Avo nain 3 nee hela iha kondisaun neebe simples tebes iha uma baraka ida neebe tuan ona, laiha kondisaun neebe seguru, fatin neebe hakmatek no izoladu husi Vila maibe sira nafatin hein esperansa ruma.
Atu responde ba situasaun nee, Prezidente Jose Ramos Horta mos akompanha iha media sosial no foti asaun konkreta orienta direta ekipa Prezidensia Republika liu husi Unidade Servisu Solidariedade Apoiu Sosial atu bele responde nesesidade urjenti no fo apoiu umanitariu ba sira nia presiza.
Apoiu nee inklui dezenvolvimentu planu ajuda emerjensia no buka solusaun longu prazu atu bele hamosu uma ida neebe diak no seguru, hodi loke dalan ba moris neebe dignu no saudavel ba sira nain 3.
(eme)
