DILI, STLTIMORLESTE.com – Prezidente Republika (PR), Jose Ramos Horta hatete, Timor Leste rekonhesidu ho nasaun neebe nakonu pas no estabilidade.
Prezidente Republika Jose Ramos Horta hatoo kestaun nee liu husi nia dikursu abertura ba semana kultural Fitun Fest Internasional Timor Leste iha Palasiu Prezidensial Nikolao Lobato, Bairo Pite, Domingu kalan (20/07/2025).
“Timor Leste ohin loron rekonhesidu hanesan nasaun estabilidade no pas nian. Ami konsideradu hanesan nasaun demokrasia forte ba dala 7 iha Azia no Australasia, no iha tinan 2025 ami okupa pozisaun ba dala 43 iha Índise Liberdade Imprensa Mundial. Iha ami nia sistema legal no konstitusional, laiha pena de morte, laiha prizaun perpetua, no laiha toleransia ba tortura,” dehan PR Horta.
Prezidente Republika hatete, TL nia sistema legal no konstitusional laiha pena de morte, laiha prizaun perpetua no laiha toleransia ba tortura, detensaun arbitru, violensia polítika ka relijioza, krimi organizadu, trafiku droga ka konsumu laho restrisaun, no naok armadu la akontese iha realidade moris.
“99.6% husi ami nia sidadaun sira mak Katoliku, neebe pratika moris iha armonia tomak ho musulmanu, protestante no minoria relijioza sira seluk. Ami mak sosiedade ida neebe pluralista, tolerante, no akolidu (kontente hasoru ema) neebe komprometidu tebes ho direitus umanus,” katak PR Horta.
Xefe Estadu dehan, iha ambiente seguru, pasífiku no demokratiku ida kontinua simu projetu foun sira, programa sira, no parseria sira iha kooperasaun kultural, sosial no desportiva, enkuantu haklean ligasaun rejional no internasional sira iha CPLP, ASEAN, iha Azia tomak, no globalmente.
Espera festival ida nee sai hanesan ponte ida ba domin no palku ida hodi fahe hanoin, kriatividade no amizade entre povu sira iha ita nia komunidade.
“Hau hakarak hafoun hau nia gratidaun ba sira hotu neebe halo enkontru memoravel ida nee sai posivel liuliu Asosiasaun Estudante no Antigu Estudante Timor Leste nian iha Kuba (AEGCTL), neebe sira-nia dedikasaun sai fundamental ba susesu eventu ida nee nian,” katak Horta.
Iha biban nee PR hatoo benvindu mai Timor Leste rai luta no pas, korajen no esperansa ida-nee, iha-neebe lian portuges no a kultura komun sira buras nafatin ho orgulhu no dignidade.
(eme)
