BAUKAU, STLTIMORLESTE.com – Eletrisidade Timor Leste, Empreza Publiku (EDTL,EP) Munisipiu Baukau durante fulan Junhu tinan nee rejista kliente nova ligasaun eletrisidade hamutuk 85 no reseitas hamutuk US$ 4.530.
Supervaizor EDTL, EP Munisipiu Baukau, Edgar B. da Silva hateten, iha fulan Junhu tinan nee Servisu Eletrisidade Munisipiu Baukau rejistu kliente hamutuk 85 kompostu kliente monofaziku 81 ho valor reseitas US$ 2.952, kliente trifaze 3 ho valor US$ 848.00 no inklui kleinte transformador 1 ho valor reseitas US$ 630.00.
“Total hamutuk fulan Junhu nian nee rekolha reseitas ba nova ligasaun nian ba kliente no transformador hamutuk US$ 4.530,” hateten Edgar ba jornalista sira iha knaar fatin Vila Nova Baukau, Tersa (22/07/2025).
Nia sublina, husi kliente 85 antes nee balun asesu ona energia eletrika, maibe simu tutan instalasaun husi vizinhu sira, tanba nee Servisu Eletrisidade halo nova ligasaun hodi fo vantajen ba kliente sira asesu enerjia eletrika.
Nia fundamenta, husi nova ligasaun nee kliente sira hanesan tipu domestika rejistu kada prepagu selu US$ 36.00, enkuantu kliente tipu komersiu kada prepagu selu US$ 73.00 no kada kliente sosa rasik fiu enkuantu parte Eletrisidade Timor-Leste oferese deit prepagu, tanba sei menus ekipamentus.
“Durante nee ita atraza iha material mak seidauk sufisiente, tanba barak mak mai sosa fiu rasik, maibe sira selu administrasi deit. Sira sosa rasik nee tanba nesesidade sira nian hakarak tuur iha Naroman,” Edgar B da Costa akresenta.
Kliente Nova Ligasaun, Alsina Joana Pinto deklara, mezmu sosa rasik ekipamentus hanesan fiu, maibe laos kestaun, tanba hakarak asesu linha eletrisidade ho seguru.
Nunee agradese ba ekipa tekniku husi Eletrisidade Timor-Leste Munisipiu Baukau neebe bele responde preokupasaun instalasaun linha eletrisidade, tanba durante nee simu tutan enerjia eletrica husi vizinhu sira neebe konsidera fo risku ba sirkuitu.
“Ami sente kontente, tanba durante nee ami liga tutan malu deit ahi sempre mate lakan halo ami nia jeleira sira aat ahi mos konslet, ami iha difikuldade nee, ema mai ami kontente no agradese,” nia informa.
Entretantu nova ligasaun nee Servisu Tekniku Eletrisidade Timor Leste Empreza Publiku Munisipiu Baukau implementa kuaze iha Munisipiu Baukau tomak neebe bazeia ba pedidu husi kleinte sira.
(tom)
