DILI, STLTIMORLESTE.com – Servisu Edukasaun Munisipiu Dili halo ona identifikasaun eskola balun neebe presiza halo reabilitasaun no konstrusaun foun inklui kontrolu fasilidade eskola.
Haktuir Superintendente Edukasaun Munisipiu Dili, Cesarina Correia Guterres ba jornalista STL iha nia knaar fatin Vila Verde, Tersa nee (22/07/2025).
“Hau hanoin kona-ba ita nian meza no kadeira maioria iha eskola sira iha Munisipiu Dili sufisiente ona, maibe iha EBF Casnafar mak meza kadeira la too no balun aat ona. Ita nian eskola balun nee fasilidade meza no kadeira sufisiente ona para estudantes sira uza ba prosesu ensinu aprendizajen iha eskola idak-idak,” nia informa.
Superintendente SEM Dili nee hatutan, kona-ba kondisaun infraestrutura iha ESJ 5 de Maio konstrusaun sala 8, maibe agora daudaun paradu hela. EBC Manleuana uma tomak 1 iha sala 4 maibe ho kondisaun aat hotu. EBF mota ulun presiza halo konstrusaun ba sala de aula.
Iha fatin seluk, Diretor SEM Manatuto, Patricio da Cruz Quintao hatete, kona-ba fasilidade no infraestrutura eskola nee sira nian Inspetores sira mak halo monitorizasaun hodi identifika kondisaun eskola no atividades hotu neebe lao iha eskola idak-idak no eskola balun presiza halo reabilitasaun no konstrusaun foun no balun presiza atu aumenta sala de aula ba estudantes sira.
“Konaba ami nian fasilidade no infraestrutura eskola nee sira nian Inspetores sira mak halo monitorizasaun hodi identifika kondisaun eskola no atividades hotu neebe lao iha eskola idak-idak, no eskola balun presiza halo reabilitasaun no konstrusaun foun, balun presiza atu aumenta sala de aula ba estudantes sira,” nia esplika.
(jac)
