BAUKAU, STLTIMORLESTE.com – Eletrisidade Timor Leste Empreza Publiku (EDTL,EP) Munisipiu Baukau monta ona prepagu ba uma komunidade sira nian neebe asesu ona eletrisidade gratuita durante fulan neen (6).
Supervaizor EDTL, EP Munisipiu Baukau, Edgar B. da Silva hateten, instalasaun linha eletrisidade neebe apoiu liu husi kompanhia lokal ba komunidade sira nia hela fatin iha Suku Gariuai, Seisal no Sagadate kuaze komunidade sira utiliza ona enerjia eletrika ho gratuita durante fulan neen, tanba nee ekipa tekniku husi Eletrisidade Timor-Leste Munisipiu Baukau kontinua kobre hodi monta prepagu ba uma komunidade.
“Iha Baukau ami hahu ona iha Suku Gariuai nian, orsida remata ona, aban ba fali ona iha Age’e nian hodi monta, neebe kontinuasaun,” hateten Edgar ba jornalista sira iha knaar fatin Vila Nova Baukau, Tersa (22/07/2025).
Nia sublina, kontinuasaun monta prepagu ba uma komunidade sira neebe utiliza ona enerjia eletrika gratuita durante fulan neen, hahu ona husi Aldeia Uatuwa no Liasidi iha Suku Gariuai, Postu Administrativu Baukau Vila, neebe tuir planu monta prepagu remata iha loron 22 Julhu nee no iha loron 23 Julhu nee kontinua kedas iha Aldeia Age’e Suku Seisal, Postu Baukau Vila no bainhira remata kontinua ba iha Aldeia Beliuali, Suku Sagadate, Postu Laga.
Nia fundamenta, stok prepagu ba programa monta prepagu iha Munisipiu Baukau parte Nasional apoiu unidade rihun 4.300 neebe monta ona rihun 3 resin no restu 400 resin kontinua iha armajem munisipal hodi kontinua ba area sira neebe seidauk monta.
“Husi 4.300 nee hela 400 resin mak hela iha nee, neebe ita monta nafatin, foin daudaun ita simu tan prepagu rihun 2 resin nee ita hein atu monta,” Edgar akresenta.
Supervaizor nee katak, aleinde monta prepagu ba uma komunidade sira parte tekniku Eletrisidade Timor Leste Munisipiu Baukau mos kontinua halo manutensaun ba servisu operasional nian, nunee nafatin garante enerjia eletrika ba klinte sira.
Entretantu ekipa tekniku husi Eletrisidade Timor Leste Munisipiu Baukau daudaun nee kontinua ezekuta servisu Projetu Eletrifika Nasional no Projetu Eletrifika Komunitariu.
(tom)
