DILI, STLTIMORLESTE.com – Timor Leste (TL) nia adezaun kompletu ba Asosiasaun Nasaun Sudeste Aziatiku (ASEAN) iha loron 26 Outubru 2025.
Lia hirak nee hatoo husi Ministru Negosiu Estranjeiru no Koperasaun (MNEK), Bendito Freitas ba jornalista sira bainhira remata halo enkontru ho Prezidente Republika José Ramos Horta iha Palasiu Prezidensial Nikolao Lobato, Bairo Pite, Tersa (22/07/2025).
Iha hasoru malu nee Ministru Negosiu Estranjeiru no Koperasaun relata ba Prezidente kona-ba rezultadu neebe halo durante Simeira nia, no konfirma katak nasaun barak apoiu Timor Leste atu adere ba ASEAN iha fulan Outubru.
Iha hasoru malu nee Prezidente Republika simu konfirmasaun ofisial kona-ba Timor Leste nia adezaun ofisial ba ASEAN.
Ministru mos relata ba Prezidente katak pasu ikus Timor Leste nia adezaun kompletu ba ASEAN iha 26 Outubru 2025.
Ministru haktuir katak, serimonia solene atu hetan adezaun ofisial nee marka ona ba loron 26 Outubru, iha Kuala Lumpur, Malazia, neebe reprezenta konkreta realizasaun husi dalan polítiku no diplomatiku neebe naruk no ezijente hahu liu husi dekada ida.
Bendito Freitas dehan, durante enkontru Simeira iha Kuala Lumpur, nasaun ASEAN sira kompromete ona apoiu masimu ba integrasaun Timor Leste nian hafoin adezaun, ho nasaun sira hanesan Singapura prepara daudaun ona programa apoiu dedikadu sira hodi haforsa rekursu umanu sira no fortalesimentu institusional.
“Iha enkontru Ministru Negosiu Estranjeiru ASEAN nia iha Kuala Lumpur nee estadu membru ASEAN hotu-hotu deklara atu fo apoiu masimu Timor Leste depois de adezaun Timor Leste,” katak Ministru Negosiu Estranjeiru.
Ministru dehan, estadu sira seluk mos prontu inklui mos parseiru dialogu hanesan Japaun, Australia, Nova Zelandia, iha reuniaun enkuantu Ajer Nova Zelandia no seluk tan fo prioridade apoiu ba Timor Leste preparasaun post adezaun katak depois adezaun ita partisipa ativamente ona iha enkontru no konferensia, lidera, ita presiza duni kuadru nee entre linas ministeriu hotu hotu.
Tuir Ministru katak, apoiu ida nee reflete konfiansa husi estadu membru sira iha kontribuisaun pozitiva husi Timor Leste hanesan membru ba dala 11 iha ASEAN.
Bainhira rona hanoin hotu Prezidente Ramos Horta hateten sei konsulta ho Primeiru Ministru, Kay Rala Xanana Gusmão atu finaliza kompozisaun delegasaun Timor Leste neebe sei partisipa iha serimonia adezaun referida no sublina importansia husi prezensa reprezentativu husi nivel aas sira.
Foku nasional agora mak atu garante katak Timor Leste partisipa nuudar membru kompetente no ativu, kontribui pozitivu ba rejiaun. Konkluzaun susesu ba prosesu adesaun nee prova perseveransa Timor Leste no nia kompromisu atu kontinua hadomi no fo imajen neebe forte no respeitadu iha politika rejional no internasional.
(eme)
