DILI, STLTIMORLESTE.com – Fulan Setembru tinan nee, Ministériu Edukasaun (ME) sei koloka manorin bolsa kandidatu profesores tinan 2024 hamutuk 187.
Asuntu nee hatoo husi Diretor Nasional Rekursu Umanu iha ME, João Amaral ba jornalista STL iha nia knaar fatin Vila Verde, Kuarta nee (23/07/2025).
“Kolokasaun nee ami sei hasai xamada ida ba sira, mai para sira atu prienxe lai formasaun iha Rairobo, submete dokumentus nee ami halo prosesu hotu ona, neebe ami halo analiza hotu ona, agora ami prepara etapa tuir mai ami sei halo xamada, nee ninia objetivu atu ema nee konkorda ho fatin neebe koloka ba nee ka lae, nee tenke konkorda para asina konkordansia ida entre Ministeriu ho kandidatu refere katak konkorda fatin nee, kuandu la konkorda fatin nee nia tenke rezeita para ami buka fali ema seluk taka fali, nee duni ninia prosesu naruk oituan, buka ema atu jere, ema tenke informadu ho sasan sira nee, bainhira ba karik bele hanorin, too ikus sira lakohi ba fatin nee ou sira abandona fatin nee ita mak halo fali prosesu dua kali lipat,” tenik nia.
Tuir Diretor Rekursu Umanu nee katak, halo xadama hotu tiha ba sira, molok atu halo tomada de pose ba sira, ema bolu dehan formasaun preparatoria nee, maizumenus semana ida, nee halo iha Rairobo, nee hanesan tama iha asrama, atu nunee sira bele fokus ho formasaun, tanba profesores nee barak laos ho background Edukasaun, nee duni sira tenke ba aprende tan pedalogia, forma karakter hanesan profesor, oinsa disiplina, ida nee halo intensivu, maizumenus semana ida.
“Formasaun nee hotu ami halo kedas ona tomada de pose ba sira, husik sira ba hanorin iha fatin terenu sira, maizumenus iha Setembru nia laran nee ita bele koloka ona, nee duni prosesu sira nee ita halo iha fulan Agostu nia laran, hanesan xamada no formasaun atu nunee Setembru nee ita halo kolokasaun, profesores 187 nee sei koloka, nee duni xamada ho formasaun nee tenke akontese uluk mak ita halo kolokasaun, nee duni ita nian profesor sira nee lalika duvida, tanba tinan nee nia laran ita sei koloka sira, sira nee ho valor 64 mai no koloka ba ensinu baziku,” dehan nia.
Iha fatin seluk, Diretor Servisu Edukasaun Munisipiu Likisa, Julio da Silva hatete, bolsa kandidatu profesores neebe iha ona bolsa nee kompetensia Ministeriu nian, tanba husi Edukasaun Munisipiu nee bainhira koloka ona mai mak foin simu sira, agora ba iha kolokasaun nee kompetensia husi ME nian.
Nia dehan, sira nian eskola balun sei menus profesores, maibe ho rekrutamentu neebe ME halo bele responde ba eskola neebe sei menus profesores, ba oin presiza aumenta tan profesores.
(jac)
